Домогт загвар зохион бүтээгч Карл Лагерфельдэд хүндэтгэл үзүүлэн гэрэл зургийн үзэсгэлэн гаргажээ. Тэрээр загвар зохион бүтээгчээс гадна гэрэл зургийн авьяасаараа олноо танигдсан нэгэн байсан билээ. "Ор мөргүй алга болох тэрхүү мөчийг үлдээж авч чаддаг учир гэрэл зурагт би дурласан" хэмээн тэрээр гэрэл зурагт яагаад дуртайгаа тайлбарласан байдаг.

Тэгвэл Швейцарын Цюрих хот дахь "Gmurzynska callery" түүний мөнхөлсөн гэрэл зургуудыг олноо дэлгэн "Карл Лагерфельд: Түүний гэрэл зурагтай өнгөрүүлсэн 30 жил" хэмээх үзэсгэлэнг нээжээ.

Энэхүү үзэсгэлэнд Николь Кидман, Кара Делевинь, Линда Евангелиста болон бусад алдартнуудын хөрөг зураг, "street style" гэрэл зураг, уран сайхны гэрэл зураг гээд 1996 оноос хойших уран бүтээлүүдийг дэлгэсэн байна. Карл Лагерфельд болон "Gmurzynska callery" нар сүүлийн 30 жилийн турш хамтран ажилласан бөгөөд галерейн захирал Матиас Расторфер Карл Лагерфельдыг "Амьдралдаа уулзаж байсан хамгийн мэдлэгтэй төдийгүй хамгийн бүтээлч, суут нэгэн" хэмээн тодотгосон байна.

Түүнд зориулсан “Homage to Karl Lagerfeld, 30 Years of Photography” гэрэл зургийн үзэсгэлэн тавдугаар сарын 15 хүртэл Швейцарын Цюрих хотноо нээлттэй байх аж.