XXI-р зууны хамгийн нэр хүндтэй дизайнер, загварын ертөнцийн амьд домог, гэрэл зурагчин, нийтлэлч Карл Лагерфельд 85 насандаа нойр булчирхайн хавдар өвчний улмаас хоёрдугаар сарын 19-ний өдөр Парис хотод таалал төгслөө.
Chanel, Fendi брэндүүдийн ерөнхий дизайнераар ажилласан байсан тэрээр сүүлийн үед өвчний улмаас хэд хэдэн чухал арга хэмжээнүүдэд оролцолгүй алгасаж байжээ.
Герман гаралтай загвар зохион бүтээгч Карл Лагерфельд Chanel брэндийн бүтээлч захирлаар 36 жилийн турш ажиллахдаа бүхэл бүтэн эрин үеийг тодорхойлж, загварын салбарыг өөрчилсөн юм.
Түүнийг дэлхийн аль ч газар цагаан үс, цагаан цамц, хар хүрэм, хар нүдний шил, үсээ боосон донжтой дүр төрх, хурц оновчтой үгс ийнхүү загварын ертөнцөд мөнхрөн үлдлээ.
Загварын салбарын мэргэжил нэгт уран бүтээлчид түүнийг багш, үлгэр дууриалал хэмээн даган хүндэлж үргэлж түүнээс бүтээлч санаа авдаг байсан юм. Карл Лагерфельд өөрийн амьдралын 70 гаруй жилийг загварын ертөнцөд зориулжээ. Тэрбээр нэгэн удаа ярилцлага өгөхдөө "Амьдрал бол гоо үзэсгэлэнгийн тэмцээн биш. Оюун ухаан л үлдэнэ. Харин залуу нас, гоо үзэсгэлэн нь улирлын чанартай ойлголт юм" хэмээн хэлж байжээ.
Карл Лагерфельд анх 1983 онд Chanel брэндэд ажиллаж эхэлсэн бөгөөд Chanel загварын ордны нэрийн хуудас болсон юбкатай хослол, богино хар даашинз, хаваастай гар цүнх зэрэг домогт загваруудыг илүү орчин үеийн уур амьсгалд оруулж, хип-хоп хэв маягтай хослуулж, заримдаа далайн эргийн стильд уусгаж, өөр үед диско чиглэлд оруулдаг байсан. Карл Лагерфельд тус брэндийн үүсгэн байгуулагч Коко Шанелийн чухалчилдаг байсан эрх чөлөө, өөртөө итгэлтэй байдал, орчин үеийн төрх зэрэг шинж чанаруудыг хэзээ ч алдагдуулж байгаагүй юм.
Түүнийг таалал төгссөний дараа загварын салбарын олон дизайнерууд болон уран бүтээлчид түүнд зориулсан сүүлийн үгсээ хуваалцсаар байна.
