/Kazinform/ Агаарын тээврийн "Flydubai" компани Дубайгаас Тель-Авивыг чиглэн нисэж явсан "Boeing 737 MAX 8" онгоцтой холбоотой гарсан хэрэг явдлыг шалгах ажиллагаа үргэлжлэх хугацаанд Израил руу хийх бүх нислэгээ түр хугацаагаар зогсоох шийдвэр гаргажээ. “Нислэгийг түр зогсоосноор холбогдох байгууллагууд шалгалтаа үргэлжлүүлж, болсон явдлын бүх нөхцөл байдлыг тогтоох боломжтой болно” гэж "Flydubai" компанийн албан ёсны төлөөлөгч аравдугаар сарын 1-ний пүрэв гаригт шилжих шөнө мэдэгдсэн байна.

Түүний хэлснээр, тус компани Арабын Нэгдсэн Эмирт Улсын (АНЭУ) Засгийн газар болон бусад “холбогдох талуудтай үйл ажиллагаагаа нягт уялдуулан ажиллаж байгаа” аж. Нислэгийг сэргээх шийдвэрийг "нэмэлт мэдээлэл ирсний дараа" гаргана гэж тэрбээр нэмж дурджээ. 

Лхагва гаригийн өглөө болсон уг хэрэг явдлын дараа Израилын Тээврийн сайд Мири Регев "Flydubai" компанийн тус улс руу хийх бүх нислэгийг цуцлахыг шаардсан байна. Тэрбээр Иргэний нисэхийн байгууллагад хандан АНЭУ Израилтай байгуулсан агаарын тээврийн хэлэлцээрийг зөрчсөн эсэхийг шалгахыг уриалжээ. Уг хэлэлцээрт Израилтай дипломат харилцаатай улс орнуудын паспортыг эзэмшдэг нисгэгчид л тус улсад онгоц буулгах эрхтэй гэж заасан байна. Харин Израил нь Оман улстай дипломат харилцаагүй юм.

Дубайгаас Тель-Авив чиглэлд FZ1073 дугаартай нислэг үйлдэж явсан "Flydubai" компанийн зорчигч тээврийн онгоц барьцаалахыг завдсан дохио өгснийхөө дараа орон нутгийн цагаар 09:00 цагийн орчимд Саудын Арабын Табук хотын нисэх буудалд яаралтай газарджээ. Урьдчилсан мэдээллээр нисгэгчдийн бүхээгт зодоон болсонтой холбоотойгоор ийм дохио өгсөн байна. Онгоцны хоёрдугаар нисгэгч нисэх багийн ахмад руу хутгатай дайрч, улмаар онгоцны удирдлагыг гартаа авахыг завдсан байна. Тэднийг тэмцэлдэж байх үеэр онгоц Саудын Арабын нутаг дээгүүр нисэж байсан бөгөөд 29 секундийн дотор 9410 метрээс 5105 метрийн өндөрт огцом унажээ.

"Boeing 737 MAX 8" онгоцонд 27 хүүхдийг оруулаад нийт 174 хүн зорчиж явсан бөгөөд тэдний дийлэнх нь Израилын иргэд байжээ. Зарим зорчигчийн ярьснаар, эхлээд нисгэгчдийн бүхээгээс хашхиралдах чимээ сонсогдож, дараа нь бүхээгийн хаалга онгойход нэг нисгэгч шархадсан, хувцас нь цус болсон байхыг харсан байна. Түүнд зорчигчид анхны тусламж үзүүлсэн бөгөөд зорчигчдын дунд эмч байсан аж. Мөн онгоцны багийн гишүүд болон зорчигчид халдагчийг аюулгүй болгож чаджээ.

Тухайн үед зорчигчоор явж байсан өөр хоёр нисгэгч онгоцыг Саудын Арабт газардуулжээ. CNN телевизийн мэдээлснээр, дараагийн нислэгээ гүйцэтгэх ёстой байсан хоёр "нөөц нисгэгч" онгоцыг газардуулсан байна. Нисгэгчдийн нэг нь Украины, нөгөө нь ОХУ-ын иргэн байсан гэж "Israel Hayom" сонинд бичжээ. Гэхдээ энэ мэдээллийг албан ёсоор батлаагүй байна. Мөн Өмнөд Африк болон Шинэ Зеландын иргэд онгоцыг газардуулсан гэсэн мэдээлэл гарчээ.