Монгол Улсын Ерөнхийлөгчийн 2027 оны ээлжит сонгууль 2027 оны зургадугаар сарын эхний хагасын аль нэг ажлын өдөр зохион байгуулагдана. Энэ нь Монгол Улс 1992 онд Үндсэн хуулиа шинэчлэн баталснаас хойш 9 дэх удаагийн Ерөнхийлөгчийн сонгууль болох юм.
Монгол Улсын Ерөнхийлөгчөөр 50 нас хүрсэн, сүүлийн таваас доошгүй жил эх орондоо оршин суусан Монгол Улсын уугуул иргэнийг хоёр шаттай сонгуулиар зургаан жилийн хугацаагаар нэг удаа сонгоно. УИХ-д суудал бүхий нам дангаараа буюу хамтран Ерөнхийлөгчид тус бүр нэг хүний нэр дэвшүүлэх боломжтой бөгөөд сонгуульд Монгол Улсын сонгуулийн эрх бүхий иргэд нийтээрээ, чөлөөтэй, шууд сонгох эрхтэй оролцож, Ерөнхийлөгчид нэр дэвшигчийн талаар саналаа нууцаар гаргана. Анхан шатны сонгуулиас сонгуульд оролцсон нийт сонгогчийн олонхийн санал (50%+1) авсан нэр дэвшигчийг сонгогдсонд тооцох ба хэрэв нэр дэвшигчдийн хэн нь ч олонхийн санал аваагүй бол хамгийн олон санал авсан хоёр нэр дэвшигчийн дунд дахин санал хураалт явуулна. Хоёр дахь санал хураалтаар аль ч нэр дэвшигч олонхын санал авахгүй тохиолдолд дахин сонгууль явуулна.
УИХ-ын 9 дэх удаагийн сонгуульд суудал авсан МАН, АН, ХҮН нам, ИЗНН болон Үндэсний эвсэл энэ сонгуульд дангаараа, эсвэл хамтран нэр дэвшүүлэх боломжтой байна гэж нэвтэрхий тольд бичжээ. Тэгвэл яагаад ч юм нэр дэвшихийг горилогчид энэ жил ажин түжин байцгаах нь хачин. Хуучин бол өдийд Ерөнхийлөгчид нэр дэвших гэсэн хүмүүс хангай говьгүй хэрэн хэсэж айлд хоол хийж найран дээр дуу өргөж явдаг сан. Нам намаасаа хүмүүс дагуулан Монголоор нэг юм болж тоос нь гозойж байдаггүй сэн бил үү. Хэн нэгэн хэт хүчтэй хүн дэвшиж бусад нь яагаад ч барахгүй гэсэн таамаг байна уу. Аль эсвэл нэр дэвшихээр горилбол шууд “ачигдана” гэсэн айдас тэднийг хүлчхээд байна уу. З.Энхболд шоронд явсан, Н.Алтанхуяг шүүх дээр байгаа зэрэг нь горилогчдыг “тушчихаад” байгаа юм болов уу.
Эдгээр хүмүүс АН-аас Ерөнхийлөгчийн сонгуульд нэр дэвшихээ зарласан нь шүүхтэй нүүр тулахад хүргэв гэж таацгааж байгаа. Сөрөг намаас ийм байж яах вэ. Тэгвэл эрх барьж байгаа намаас ч бас нам гүм байдаг нь ямар учиртай юм бэ. Сүүлийн жил шахуу хугацаанд МАН-аас Ерөнхийлөгчид нэр дэвшинэ гэсэн таамагтай яваа Г.Занданшатар нь ч бас хаа байгаа нь мэдэгдэхгүй нам гүм байх юм. Горилогчид гадуур манаргах нь байтугай хэвлэл мэдээлэл дээр ч нэрээ гаргахаас айцгааж байх шиг санагдах юм. Арай болоогүй байгаа юм болов уу, аль эсвэл ийм айхтар дарангуйлал тогтчихоод байгаа юм болов уу. МАХН-ын далан жилийн дарангуйллыг, Зөвлөлт Оростой нь унагаад гарсан АН бас яагаад дув дуугүй байгаад байгааг ойлгохгүй байна. Бид ардчилсан улсад амьдарсан хэвээрээ байгаа юу. Аль эсвэл авторитар дэглэм хэзээний тогтчихсон байна уу.
Ө.Тулга, Өдрийн сонин
