Испани руу явж буй аяллын хөлөг онгоцонд хантавирусний халдвар гарсны улмаас найман хүн өвчилж, тэднээс гурван хүн нас барсан тухай Дэлхийн Эрүүл мэндийн байгууллага (ДЭМБ) баасан гаригт мэдээлжээ. Лабораторийн шинжилгээгээр нийт зургаан тохиолдол нь хантавирусний нэгэн төрөл болох "Андес" вируснийх болох нь албан ёсоор батлагдаад байгаа бол хоёр нь халдварын "сэжигтэй" тохиолдол ажээ.
Тавдугаар сарын 2-ны өдөр халдвар анх бүртгэгдэх үед хөлөг онгоцонд 147 зорчигч болон багийн гишүүд байснаас 34 хүн хэдийнэ хөлөг онгоцноос буугаад байна. Одоогоор халдвар авсан дөрвөн өвчтөн ӨАБНУ, Нидерланд, Швейцарын эмнэлгүүдэд хэвтэн эмчлүүлж байгаа бөгөөд Германд бүртгэгдсэн сэжигтэй нэг тохиолдлын шинжилгээний хариу сөрөг гарсан байна.
Уг хөлөг онгоцонд АНУ-ын 17 иргэн зорчиж байгааг "Oceanwide Expeditions" компаниас мэдээлсэн бөгөөд АНУ-ын Өвчний хяналт, урьдчилан сэргийлэх төв нөхцөл байдлыг анхааралтай ажиглаж байна. Тус төв америк иргэдийг тусгай үүргийн онгоцоор Небраска муж улсын Омаха хот руу нүүлгэн шилжүүлж, тусгаарлахаар төлөвлөжээ.
Тавдугаар сарын 6-нд Кабо-Верде улсаас хөдөлсөн уг хөлөг онгоц Испанийн Канарын арлуудыг чиглэн явж байгаа бөгөөд зорчигчдыг тэнд буулгахаар төлөвлөж байна. ДЭМБ-ын шинжээчдийн урьдчилсан дүгнэлтээр, анхны тохиолдол нь зорчигчид хөлөг онгоцонд суухаас өмнө Аргентин эсвэл Чилид байх үед авсан халдвар байх магадлалтай юм.
Одоогоор халдвар дэлхий даяар тархах эрсдэл бага боловч хөлөг онгоцонд яваа хүмүүсийн хувьд "дунд зэргийн эрсдэл" байгааг ДЭМБ анхаарууллаа.
Reuters
