Дэлхийн тэрбумтан Илон Маск өөрийн эзэмшлийн “X” (хуучин нэрээр Twitter) платформыг бүх төрлийн үйлчилгээг нэг дор нэгтгэсэн “Everything App” буюу “бүхнийг багтаасан хавсралт” болгон хувиргах ажлынхаа хүрээнд “X Money” төлбөр тооцооны үйлчилгээгээ удахгүй нээх гэж байгаагаа мэдэгдлээ. Тэрээр 2026 оны хоёрдугаар сарын 12-ны өдөр болсон “xAI” компанийн уулзалтын үеэр уг төсөл одоогоор дотоодын туршилтын шатандаа амжилттай явж байгааг онцолсон байна.

Маскийн хэлснээр, “X Money” үйлчилгээ нь эхний нэгээс хоёр сарын хугацаанд хязгаарлагдмал хүрээний хэрэглэгчдэд зориулсан бета хувилбараар нээгдэх аж. Үүний дараа туршилтын үр дүнд тулгуурлан дэлхий даяарх “X” платформын бүх хэрэглэгчдэд нээлттэй болох юм. Тэрээр энэхүү үйлчилгээг бүх төрлийн мөнгөн гүйлгээний төв цэг, санхүүгийн ертөнцөд тоглоомын дүрмийг өөрчлөх “game changer” болно гэдэгт итгэлтэй байгаагаа илэрхийлжээ.

Тус компани нь төлбөр тооцооны үйл ажиллагаа явуулахын тулд АНУ-ын 40 гаруй мужид мөнгөн шилжүүлгийн тусгай зөвшөөрлөө аваад байгаа бөгөөд Visa компанитай стратегийн түншлэл тогтоосноор хэрэглэгчид өөрийн дебит картыг ашиглан P2P (хүнээс хүнд) шилжүүлэг хийх боломж бүрдэж байгаа юм.

Мөн “X” платформын бүтээгдэхүүн хариуцсан захирал Никита Биерийн мэдээлснээр, ойрын хугацаанд “Smart Cashtags” хэмээх шинэ функц нэмэгдэх бөгөөд ингэснээр хэрэглэгчид өөрийн timeline-аас шууд хувьцаа болон криптовалютын арилжаа хийх, үнийн мэдээллийг цаг алдалгүй харах боломжтой болох аж. Хэдийгээр криптовалютын хөрөнгө оруулагчид Dogecoin болон бусад дижитал активыг уг системд нэгтгэнэ гэсэн өндөр хүлээлттэй байгаа ч одоогоор крипто арилжааг шууд платформ дээрээс хийх үү, эсвэл гадны биржүүд рүү холбох уу гэдэг нь эцэслэн шийдэгдээгүй байна.

Эх сурвалж: Office life