“БНХАУ-ын инженер, технологийн 19 дэх үзэсгэлэн, Монгол–Хятадын барилга, дэд бүтцийн хөрөнгө оруулалтын форум”-ыг энэ сарын 18–20-нд Улаанбаатар хотод зохион байгуулна.

Монголын Барилгын үндэсний ассоциаци ТББ, БНХАУ-ын Олон улсын гэрээлэгчдийн нийгэмлэг (CHINCA), Хятадын Машин механизмын инженерийн корпорацийн олон улсын үзэсгэлэн зохион байгуулагч газар хамтран зохион байгуулах форумд БНХАУ-ын тэргүүлэгч барилга, дэд бүтцийн салбарын хөрөнгө оруулагч, бизнес эрхлэгчидтэй хамтран ажиллах барилга, дэд бүтэц, үл хөдлөх хөрөнгө, барилгын материалын үйлдвэрлэл, ханган нийлүүлэлтийн чиглэлийн аж ахуй нэгж, бизнес эрхлэгчид оролцоно.

Форум нь монголын компаниудад төслөө танилцуулах, Хятадын тэргүүлэгч корпорациудын орчин үеийн дэвшилтэт техник технологи, инновацитай танилцахын зэрэгцээ Хятадын хамгийн том хөрөнгө оруулагчидтай холбогдон, стратегийн бодлого, бизнесийн хамтын ажиллагаа, хөрөнгө оруулалтын түвшний хэлэлцүүлэг өрнүүлж, бизнесийн гэрээ хэлэлцээр хийх, хөрөнгө оруулалтын боломжоо нэмэх, барилгын салбарын эдийн засгийн өсөлтийн тогтвортой орчныг бүрдүүлэхэд түлхэц болох юм.

Манай улс БНХАУ-тай 1949 оноос дипломат харилцаа тогтоон, эдийн засаг, худалдаа, бүтээн байгуулалтын бүх салбарт хамтын ажиллагаагаа хөгжүүлж иржээ. Монгол Улсын гадаад худалдааны эргэлт 2024 оны байдлаар 24 тэрбум ам.долларт хүрсний 65 орчим хувийг БНХАУ-тай хийсэн худалдаа эзэлж байна. Дэлхийн эдийн засаг, бүс нутгийн геополитикийн нөхцөл байдал өөрчлөгдөж буй энэ цаг үед хоёр улсын бизнесийн хамтын ажиллагаа шинэ шатанд гарч, хамтарсан төслүүд нь барилгын салбараар хязгаарлагдахгүй дэд бүтэц, тээвэр ложистик, эрчим хүч, инженерчлэл, техник технологи, инновацийн салбарт өргөжиж байгаа билээ.