Аймгийн нийт нутгийн 48 хувьд гандуу, 2 хувьд гантай, 50 хувьд хэвийн байна. Бэлчээрийн дундаж ургац ажиглалтын талбайд 3.2 ц/га байна. Өөрөөр хэлбэл ихэнх нутгаар халуун, салхи ихтэй, ус чийг бага, хуурайшилт их байснаас ургамлын ургалт удааширч, хадлангийн талбайгаас өмнөх жилүүдтэй харьцуулахад гарц муу байна.
Бэлчээрийн даацыг тооцоолж гаргасан дүнгээс үзвэл нийт нутгийн:
30.9 % - бэлчээрийн нөөцтэй
20.9 % - бэлчээр хүрэлцээтэй
34.9 % - даац 1-3 дахин хэтэрсэн
5.5 % -даац 3-5 дахин хэтэрсэн
7.7 % - даац олон дахин хэтэрсэн байна.
Өөрөөр хэлбэл, ирэх өвөл, хаврын бэлчээрийн даац нутгийн 50 хувьд хүрэлцээтэй, 50 хувьд хэтэрч гарчээ. Даац хэтэрч гарсан нутгийн хэмжээ өмнөх жилийнхээс 20 хувиар нэмэгдэж гарсан байна.
Булган аймгийн Орхон сумын Арбулаг багийн Улсын аварга малчин С.Энхбаяр, Энэ жил ус бороо багатай байснаас өвс богино, хадаад тээвэрлэхдээ тор татаж ачихгүй л бол тогтохгүй байгааг хэлж, өмнөх жилүүдэд энэ талбайгаас нэлээд хэдэн айл өвс хадлангаа бэлтгэдэг байсан бол энэ жил манайтай нийлээд хоёр айл 7, 8 машин өвс арай гэж хадлаа. Өвөл, хавартаа хэрэглэх өвсөө худалдаж л авахаас өөр аргагүй хэмээж, малчид иргэдэдээ эртхэн өвс тэжээлийн ая бодохгүй бол их л чанга өвөл болох нь гэж хуучилсан байна.
