2025-2026 оны хичээлийн жилд сургуулийн өмнөх боловсролд 300 орчим мянга, ерөнхий боловсролд 830 орчим мянган хүүхэд суралцахаар урьдчилсан тооцоо гарчээ. Энэ нь өмнөх жилээс 30 мянга орчим сурагч нэмэгдэж буйг харуулж байгаа бөгөөд сургалтын ачаалал нэмэгдэж буйтай холбогдуулан сургуулийн анги танхим түрээслэхэд нэмэлт эх үүсвэр шаардагдаж байна.

Сүүлийн нэг жилд боловсролын салбарт 3430 суудал бүхий ерөнхий боловсролын долоон сургууль, 400 орны хүчин чадалтай таван цэцэрлэг, 280 орны нэг цогцолбор, 270 орны хоёр дотуур байр болон спорт заалууд ашиглалтад оржээ. Мөн шинээр баригдсан сургуулийн тоног төхөөрөмж, ялангуяа ширээ сандлыг Азийн хөгжлийн банкны санхүүжилтээр нийлүүлэхээр болсон боловч Сангийн яамнаас зөвшөөрлийн бичиг хүлээгдэж байна.

Хүүхдийн тоо нэмэгдэж буйтай зэрэгцэн багшийн хангалт асуудал хэвээр байгаа юм. Боловсролын сайд П.Наранбаярын мэдээлснээр цэцэрлэгт мянга гаруй, ерөнхий боловсролын сургуульд 3200 орчим багшийн сул орон тоо бий. Үүнийг нөхөхийн тулд дадлагажигч болон ахмад багш нарыг ажиллуулах түр арга хэмжээ авч байгаа ч урт хугацаанд тогтвортой хангалт бий болгохын тулд багшийн цалинг, тэр дундаа үндсэн цалинг нэмэгдүүлэх шаардлагатай байгааг онцоллоо.

Эх сурвалж: Засгийн газрын хэвлэл мэдээлэл, олон нийттэй харилцах газар