Нийслэлийн хэмжээнд авто зогсоолын хүрэлцээг нэмэгдүүлэх зорилгоор төр, хувийн хэвшлийн хамтын ажиллагааны хүрээнд ил болон далд зогсоолуудыг шинээр байгуулахаар төлөвлөж, эхний ээлжид 90 байршилд зураг төсөл, төлөвлөлт хийж байна. Үүнээс иргэдийн санал хүсэлтэд тулгуурлан 40 байршилд ажил эхлүүлэхээр дүүрэг тус бүрд шат дараатай зохион байгуулж буйг албаныхан мэдээллээ.

Тухайлбал, нийслэлийн Ерөнхий архитектор Ч.Төгсдэлгэр өнөөдөр Сүхбаатар, Хан-Уул дүүргийн холбогдох албаныхантай хамтран шаардлагатай байршлуудад ажилласан байна. Сүхбаатар дүүргийн 1 дүгээр хороо, “Чонон бүрт төв” орчимд нэгдсэн, цэгцтэй зогсоол байхгүйн улмаас явган зорчигч, тээврийн хэрэгсэл чөлөөтэй зорчих нөхцөл хязгаарлагдаж, түгжрэлийг нэмэгдүүлдэг гэж үзжээ. Иймд 1800 ам метр талбайд ил авто зогсоол барьж, зохион байгуулалттайгаар ашиглах боломжийг бүрдүүлэхээр зорьж байна. Мөн “Чонон бүрт төв”-ийн урд талын зам дагуух зогсоолыг өөр зохион байгуулалтаар шийдэх шаардлагатай гэдгийг нийслэлийн Ерөнхий архитектор онцолсон байна.

Харин Хан-Уул дүүргийн 20 дугаар хороо, Лавай зах орчимд байрлах орон сууцны хотхонуудын дунд авто зогсоол хүрэлцээгүй, ногоон байгууламж, хүүхдийн тоглоомын талбайн зай багатай байдаг тул одоогийн зогсоолуудыг нэгтгэн, тус захын хойд талд байрлах нийтийн эзэмшлийн талбай руу шилжүүлж, илүү багтаамжтай зогсоол барих нь зүйтэй хэмээн үзжээ. Ингэснээр орон сууцны хорооллын дунд тоглоомын талбай, ногоон байгууламжийг нэмэгдүүлэх боломжтой болохыг архитектор Ч.Төгсдэлгэр тодотгож, энэ талаар оршин суугчдын саналыг нэгтгэн шийдвэр гаргахыг хариуцсан албаныханд даалгасан байна.

Нийслэлд өнөөдрийн байдлаар ил зогсоолуудын долоон хувь нь л төлбөртэй байдаг гэсэн судалгаа гарсан бөгөөд авто зогсоолын хүрэлцээ муугаас үүдэн замын хөдөлгөөнд сөргөөр нөлөөлөх, замбараагүй байдал бий болдог тул шинээр төлөвлөж буй зогсоолуудыг цэгцтэй, журмын дагуу ашиглах нөхцөлийг бүрдүүлэх шаардлагатайг холбогдох байгууллагууд мөн онцолж байна.

Эх сурвалж: Нийслэлийн Ерөнхий Архитекторын алба