Унадаг дугуйтай бага насны хүүхэд замын хөдөлгөөнд оролцож байх үедээ ачааны автомашинд дайруулж, амь насаа алдсан харамсалтай хэрэг энэ оны зургаадугаар сарын хорин долооны өдөр Увс аймагт бүртгэгджээ. Тухайн өдөр аймгийн цагдаагийн газарт “Гурван замын уулзварт ачааны автомашин унадаг дугуйтай хүүхэд дайрсан байна” гэсэн дуудлага ирсэн бөгөөд шуурхай бүрэлдэхүүн хэргийн газарт ажиллаж, шалгалт явуулсан байна. Урьдчилсан байдлаар иргэн “Б” нь HOWO ZZ3257 улсын дугаартай ачааны автомашиныг жолоодож явахдаа унадаг дугуй унаж явсан бага насны хүүхдийг мөргөж, амь насыг нь хохироосон нь тогтоогдсон талаар албаныхан мэдээлэв.

Сурагчдын зуны амралтын үе үргэлжилж буй энэ өдрүүдэд эцэг эхчүүд бага насны хүүхдээ унадаг дугуй, скүүтэр, цахилгаан тээврийн хэрэгслээр замын хөдөлгөөнд оролцуулахгүй байх, хүүхдэдээ тавих хараа хяналтаа сайжруулах нь нэн чухал байгааг цагдаагийн байгууллага анхаарууллаа. Мөн жолооч нарт хөдөлгөөний аюулгүй байдлыг чанд сахиж, анхаарал болгоомжтой зорчихыг онцгойлон сэрэмжлүүлж байна.

Эх сурвалж: Цагдаагийн Ерөнхий Газрын Хэвлэл, Мэдээллийн Төв