2025 оны зургаадугаар сарын 26-ны өдөр “Урсгал уснаас эрэн хайх, аврах ажиллагаа” сэдэвт хамтарсан дадлага сургууль албан ёсоор эхэллээ. Энэхүү сургуулийг БНСУ-ын Үндэсний аврах бригад болон Монгол Улсын Аврах анги, Баянзүрх дүүргийн Онцгой байдлын хэлтсийн алба хаагчид хамтран зохион байгуулж байна.

Сургуулийн гол зорилго нь аврагчдын мэргэжлийн мэдлэг, ур чадварыг нэмэгдүүлэх, олон улсын хэмжээнд хүлээн зөвшөөрөгдсөн арга зүй, дадлагыг харилцан солилцох, улмаар хамтарсан ажиллагааны үр нөлөөг дээшлүүлэхэд чиглэж байна. Дадлага сургуульд БНСУ-ын 119 дүгээр ангийн усчин аврагчид ч оролцож байгаа нь туршлага солилцох боломжийг бүрдүүлж буй онцлогтой.

Дадлагын хүрээнд дараах сэдвийн дагуу сургалт, дадлага явагдаж байна. Үүнд:

• Урсгал устай орчинд эрэн хайх маршрут төлөвлөлт

• Түргэн урсгалд тандалт хийх арга зүй

• Усанд осолдсон хүний байршлыг тогтоох

• Усны гүний чиглэл болон аюулгүй байдлын үнэлгээ хийх аргачлал

Жил бүрийн дулааны улиралд гол, мөрөн, нуурын эрэг орчимд иргэдийн амь нас, эрүүл мэндэд эрсдэл үүсэх нь ихэсдэг. Иймд урьдчилан сэргийлэх мэдлэг олгохоос гадна, аврагчдыг шуурхай, мэргэжлийн түвшинд ажиллах чадвартай байлгах зорилгоор энэ төрлийн дадлага сургуулиудыг тогтмол зохион байгуулж ирсэн бөгөөд энэ удаагийн хамтын ажиллагаа нь олон улсын түвшинд илүү өргөн хүрээтэй болсноороо онцлог юм.

Хамтарсан сургуулиар дамжуулан усны ослоос урьдчилан сэргийлэх мэдлэг түгээх, аврах ажиллагааны шуурхай зохион байгуулалт, зохицуулалтыг сайжруулах, улмаар алба хаагчдын мэргэжлийн бэлэн байдлыг хангах чухал ач холбогдолтой гэж холбогдох албаныхан онцолж байна.

Эх сурвалж: Онцгой байдлын ерөнхий газар