Засгийн газрын хуралдаанд өчигдөр “Жендэрийн эрх тэгш байдлыг хангах үйл ажиллагааны хэрэгжилт, үр дүнгийн талаар” танилцууллаа. Тус тайлангаар Монгол Улсын жендэрийн тэгш байдлын талаарх олон улсын үнэлгээ, үндэсний бодлогын хэрэгжилтийн ахиц дэвшлийг дүгнэжээ.
Дэлхийн эдийн засгийн форумын гаргадаг жендэрийн ялгаатай байдлын индексээр Монгол Улс 2024 онд 145 улсаас 85 дугаарт эрэмбэлэгдэж байсан бол 2025 онд 148 улсаас 65 дугаарт жагсаж, 20 байраар урагшилсан байна. Энэ нь жендэрийн тэгш байдалд чиглэсэн бодлого, хөтөлбөрийн үр дүн гарч байгааг харуулж буй чухал үзүүлэлт юм.
Индексийн дэд үзүүлэлтүүдээс:
-
Боловсрол, эрүүл мэндийн салбарт үзүүлэлт тогтвортой, ахицтай хэвээр байна
-
Эмэгтэйчүүдийн улс төрийн оролцоо 2024 онд 120-р байранд байсан бол 2025 онд 99-д хүрч 21 байраар ахисан
-
Эмэгтэйчүүдийн хөдөлмөрийн зах зээл дэх оролцоо 43-р байраас 20-р байрт хүрч дэвшсэн байна
Эдгээр нь “ахиц дэвшилттэй” хэмээн үнэлэгдсэн бөгөөд жендэрийн тэгш байдлыг хангах чиглэлд хийгдсэн бодлогын арга хэмжээ, хуулийн хэрэгжилт, олон нийтийн оролцооны үр дүн хэмээн тайлбарлаж байна.
Монгол Улсын “Жендэрийн эрх тэгш байдлыг хангах тухай хууль”-ийн дагуу, Засгийн газар энэхүү хэрэгжилтийн тайланг УИХ-д тогтмол тайлагнах үүрэгтэй бөгөөд энэ удаагийн танилцуулга нь 2021 оноос хойш гурав дахь удаа хүргүүлж буй албан ёсны тайлан болох юм.
Эх сурвалж: Монгол Улсын Засгийн газар
