Улаанбаатар хотын хөгжлийн гол цөм болох “Сэлбэ хотын орон сууцжуулах төсөл”-ийн 3, 4 дүгээр багц тендерийг 5 хэсэгт хувааж зарлахаар болсон талаар албаныхан өнөөдөр мэдээллээ. Энэ талаар нийслэлийн Засаг даргын нэгдүгээр орлогч Т.Даваадалай, “Сэлбэ 20 минутын хот корпорац”-ын гүйцэтгэх захирал У.Баатар болон барилгын салбарын төлөөлөл мэдээлэл хийв.

Т.Даваадалай хэлэхдээ:

“Улаанбаатар хотоос хэрэгжүүлж буй 24 мега төслөөс хамгийн чухал нь Сэлбэ хотын төсөл юм. Энэ нь агаарын бохирдлыг бууруулах, иргэдийн амьдрах орчныг шинэ түвшинд хүргэх зорилготой “20 минутын хот”-ын анхны загвар хот болно” хэмээн онцлов.

Сэлбэ хот нь нийт 158 га талбайд багтах бөгөөд бүтээн байгуулалтаар:

• Орон сууц

• Инженерийн шугам сүлжээ (цахилгаан, дулаан, цэвэр/бохир ус)

• Сургууль, цэцэрлэг, ногоон байгууламж

• Худалдаа, үйлчилгээний төвүүд
  зэргийг иж бүрнээр байгуулж, нийт 45 багц ажил хэрэгжүүлэх юм байна.

Төслийн санхүүжилт:

• Олон улсын бондоор 500 сая ам.долларын хөрөнгө татсан

• Төр, хувийн хэвшлийн түншлэлээр 2.3 их наяд төгрөгийн шууд хөрөнгө оруулалт

• Хувийн хэвшлээс 20 орчим их наяд төгрөг

• Нийт 25 их наяд төгрөгийн бүтээн байгуулалт болно гэж тооцоолж байна.

3, 4 дүгээр багц тендерийн хуваарилалт:

• Барилгын холбоодын хүсэлтийн дагуу хөрөнгө оруулагч талтай хоёр удаа цахим уулзалт хийж, багцыг 5 хэсэгт хуваах зөвшөөрөл авсан

• Эхний багцад есөн давхар, 71 айлын 11 блок орон сууц баригдана

• 2–5 дугаар багцуудад мөн есөн давхар, 71 айлын 48 блок орон сууц барихаар төлөвлөгдсөн

Одоогийн байдлаар Сэлбийн 26 багц ажилд давхардсан тоогоор 198 байгууллага саналаа ирүүлээд байгаа бөгөөд хамтран ажиллах аж ахуйн нэгжүүдийн санал хүсэлтийг үргэлжлүүлэн хүлээн авч байна.

“Сэлбэ хот” төсөл нь Улаанбаатарын төвлөрлийг сааруулах, гэр хорооллын шинэ суурьшлын бүсийг шинэлэг концепц, “20 минутын хот” төлөвлөлтийн дагуу хөгжүүлэх стратегийн төслүүдийн нэг болоод байна.

Эх сурвалж: НЗДТГ, “Сэлбэ 20 минутын хот” корпорац