Монгол Улсад автотээврийн салбар үүсэж хөгжсөний 100 жилийн ой энэ онд тохиож буйтай холбогдуулан “Автотээвэрчдийн улсын III зөвлөгөөн”-ийг өнөөдөр Төрийн ордонд зохион байгуулж байна. Зөвлөгөөнд улс орон даяарх 21 аймгаас 1000 гаруй төлөөлөгч хүрэлцэн ирж оролцож байгаа бөгөөд зөвхөн өнгөрсөн түүхэн амжилтыг биш, харин ирээдүйн зорилго, хөгжлийн чиг хандлагыг хамтдаа тодорхойлж буй нь онцлог юм.
Зам, тээврийн хөгжлийн сайд Б.Дэлгэрсайхан зөвлөгөөний үеэр хэлэхдээ, Монгол Улс зах зээлийн эдийн засагт шилжсэн 1990-ээд оноос хойш автотээврийн байгууллагуудын бүтэц өөрчлөгдөж, тээврийн хэрэгсэл, авто замын сүлжээний тоо хэмжээ эрс өссөн гэдгийг онцлов. Тэрбээр, "Манай улс 10 гаруй олон улсын гэрээ, конвенцид нэгдэж, 17 улстай автотээврийн тухай хэлэлцээр байгуулан, үндэсний тээврийн сүлжээг Азийг Европтой холбосон олон улсын тээврийн замд нэгтгэж чадсан" хэмээн мэдэгдэв.
Өнөөдрийн байдлаар Монгол Улсын ачаа тээврийн 65 хувь, зорчигч тээврийн 98 хувийг автотээврийн салбар гүйцэтгэж байгаа бөгөөд энэ нь материаллаг үйлдвэрлэлийн дөрөв дэх том салбар болсныг салбарынхан онцолж байна.
Зөвлөгөөний хүрээнд салбарынхны ажиллах орчныг сайжруулах, чадавхжуулах, боловсрол, сургалт, аюулгүй байдлыг нэмэгдүүлэх зэрэг бодит асуудлыг хэлэлцэж, үнэтэй санаа, зөвлөмжийг дэвшүүлэх юм. Мөн дараагийн 100 жилийн хөгжлийн хөтөлбөр, шинэчлэлийн гол цөм юу байх талаар өргөн хүрээнд санал солилцож байна.
Эх сурвалж: Засгийн газрын Хэвлэл мэдээлэл, олон нийттэй харилцах газар.