Улаанбаатар хотын орон сууцжуулах бодлогын хүрээнд Сонгинохайрхан дүүргийн 5 дугаар хороо, Ханын материал орчимд 12.6 га газарт 1800 айлын орон сууц барих томоохон төсөл эхэллээ. Энэ ажлын хүрээнд өнөөдөр нийслэлийн Засаг даргын нэгдүгээр орлогч Т.Даваадалай, “Нийслэлийн Орон сууцны корпораци” ХК-ийн гүйцэтгэх захирал М.Говьсайхан нар газар дээр нь ажиллав.

Тус төслийг хэрэгжүүлэгчийг сонгон шалгаруулах ажиллагаа өнөөдрөөс эхэлж, компаниудын санал хүлээн авах эцсийн хугацаа наймдугаар сарын 7-ны 11:00 цаг байхаар тогтоожээ. Шалгаруулалт нь Хот, суурин газрыг дахин хөгжүүлэх тухай хууль болон Гэр хорооллын газрыг дахин төлөвлөн барилгажуулах журам-д үндэслэн явагдах юм.

Одоогийн байдлаар уг байршилд газар чөлөөлөлт 82 хувийн явцтай бөгөөд долоодугаар сарын дотор бүрэн дуусгахаар төлөвлөж байна. Дэд бүтцийн асуудлыг нийслэл хариуцаж шийдсэн тул компаниуд зөвхөн барилгын ажлыг эхлүүлэх нөхцөлтэй байна.

Төсөлд оролцох компаниуд:

• Барилгын тусгай зөвшөөрөлтэй байх

• Санхүүгийн чадамжтай байх

• Өндөр үр ашиг бүхий санал гаргах

Энэ удаагийн төсөл өмнөх ижил төслүүдээс ялгаатай нь төрөөс газар чөлөөлөлт болон дэд бүтцийн асуудлыг шийдвэрлэж өгсөн, зураг төслийн ерөнхий хувилбар ч бүрдсэн тул ажлыг саадгүй гүйцэтгэх боломжтой болжээ. Харин өмнө нь хэрэгжиж байсан төслүүд дээр барилгын зөвшөөрөлд хэт анхаарч, дэд бүтэц, газар чөлөөлөлт шийдэгдээгүйгээс иргэд хохирох тохиолдол гарч байсныг холбогдох албаныхан онцлов.

“Ханын материалын 1800 айлын орон сууцны төсөл” нь:

• Ногоон байгууламж

• Сургууль, цэцэрлэг

• Кино театр, үзвэр үйлчилгээний төв

• Орчин үеийн оффисын барилга
  зэрэг цогц шийдэлтэй байхаар төлөвлөгдсөн бөгөөд хамгийн өндөр барилга нь 12 давхар, бусад нь шаталсан хэлбэрээр 9 болон 7 давхар байх аж.

Энэхүү хороолол нь “20 минутын хот” концепцтой уялдсан, жишиг загвар бүхий шинэ суурьшлын бүс болохоор төлөвлөгдөж байна. Шалгарсан компани тухайн төлөвлөлтийн хүрээнд өөрийн хөгжүүлэлтийг үргэлжлүүлэн хийх боломжтой юм.

Сүүлийн хоёр жил хүрэхгүй хугацаанд Нийслэл нийт 2584 нэгж талбарт газар чөлөөлөлт хийж, өнгөрсөн арван жилийн дүнтэй бараг дүйцэхүйц амжилтад хүрээд байна.

Эх сурвалж: Нийслэлийн Орон сууцны корпораци, НЗДТГ.