Нийслэл Улаанбаатар хот 2025 оныг “Бүтээн байгуулалтын жил” болгон зарласантай холбоотойгоор нийтийн эзэмшлийн зам талбайн засвар, шинэчлэлийн ажлууд эрчимжиж байна. Энэ хүрээнд өнгөрсөн тавдугаар сард нийслэлийн Хяналт шалгалтын газраас төвийн зургаан дүүрэгт гэрэлтүүлгийн ашиглалт, засвар үйлчилгээ эрхэлдэг арван найман аж ахуйн нэгжид хяналт шалгалт хийж, зөрчил арилгах хугацаатай мэдэгдэл хүргүүлсэн.
Тухайн ажлын үргэлжлэл болгож, өчигдөр Хан-Уул дүүргийн 15 дугаар хороо, Гандигийн гудамж дагуух гэрэлтүүлгийн байгууламжийн гүйцэтгэлийн биелэлтийг газар дээр нь шалгажээ. Шалгалтаар гэрэлтүүлгийн шонг тэгшлэх, өнгө үзэмжийг сайжруулах, ил гарсан цахилгааны утас, кабель зэрэг аюултай зөрчлүүдийг арилгуулах арга хэмжээ авсан байна.
Нийслэлийн Хяналт шалгалтын газрын Дэд бүтцийн стандарт, хяналтын хэлтсийн дарга Б.Найрамдал хэлэхдээ, “Хотын өнгө үзэмжийг сайжруулж, иргэдийн эрүүл, аюулгүй, ая тухтай орчинд амьдрах нөхцөлийг хангах үүднээс нийслэлийн есөн дүүрэгт зөрчил арилгах ажлыг үе шаттай зохион байгуулж байна. Үүний хүрээнд өнөөдрийн байдлаар 221 шонг тэгшилж, 670 шонг дахин будсан. Мөн 3000 гаруй шонгийн гэрэлтүүлгийг шинэчилж, засварласан” хэмээв.
Түүнчлэн гэрэлтүүлгийн шон дээр байрлаж буй шилэн кабелийг стандартын дагуу байрлуулах, аюулгүй байдлыг хангах чиглэлээр цаашид хяналт шалгалтын ажлыг үргэлжлүүлэхээр төлөвлөжээ.
Эх сурвалж: Нийслэлийн Хяналт шалгалтын газар.
