Өнөөдөр Монгол Улсад улс төр, урлаг, спорт, олон улсын харилцаа, соёлын салбарт онцлох үйл явдлууд болох гэж байна. Тухайлбал, Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Узбекистан Улсын Ерөнхийлөгч Шавкат Мирзиёев төрийн айлчлал хийнэ. Энэ нь хоёр орны харилцаа, хамтын ажиллагаанд чухал ахиц гаргах айлчлал хэмээн онцолж байна.

11:00 цагт Монголын Үйлдвэрчний Эвлэлийн холбооны Ерөнхий зөвлөлөөс холбооны XXIV их хурлын өмнөх мэдээлэл болон цаг үеийн асуудлаар хэвлэлийн хурал зохион байгуулна. Холбогдох утас: 99149240

11:30 цагт Монгол Улсын Ерөнхийлөгчийн ивээл дор зохион байгуулагдах “Монгол дархан 2025” үзэсгэлэнгийн талаар Үндэсний мэдээллийн төвд албан ёсны мэдээлэл өгнө. Тус үзэсгэлэн Чингис хаан үндэсний музейд долдугаар сарын 3-10-ны өдрүүдэд болно.

Түүнчлэн өнөөдөр УИХ-аас Олон улсын парламентын холбоотой (ОУПХ) хамтран зохион байгуулж буй Хүний эрхийн төлөв байдлын ээлжит нэгдсэн хэлэлцүүлэг (UPR) үргэлжилж байна.

“Зүүн хойд Азийн энх тайван, хөгжил ба Солонгосын нэгдлийн талаарх Монголын форум” нь энэ сарын 20-ноос 24-ний өдрүүдэд үргэлжилж, өнөөдөр хаалтаа хийнэ.

Спортын салбарт: Сагсан бөмбөгийн 3х3 төрлийн насанд хүрэгчдийн Дэлхийн аварга шалгаруулах тэмцээн энэ сарын 23-29-нд зохион байгуулагдаж байна.

Орон нутагт:

• Архангай аймагт Булган хайрханы энгэрт “Тунгалаг Тамир” уртын дууны наадам анх удаа зохион байгуулагдана.

• Мөн Архангай аймгийн музейд “Байгалийг ойроос” нэртэй түр үзэсгэлэн энэ долдугаар сарын 28-ныг хүртэл олон нийтэд нээлттэй байна.