Нийслэлийн хэмжээнд авто замын түгжрэл, гэмт хэрэг, зөрчил, зам тээврийн ослоос урьдчилан сэргийлэх зорилгоор “Теле камерийн нэгдсэн төв” болон 9 дүүрэг бүрт дэд төвүүдийг байгуулжээ. Энэхүү ухаалаг хяналтын системийг Улаанбаатар хотын Засаг дарга Х.Нямбаатарын санаачилгаар хэрэгжүүлж, нийслэлийн Иргэдийн төлөөлөгчдийн хурлын дарга А.Баярын зүгээс нэн чухал ажил хэмээн онцолсон байна.

Шинэчлэгдсэн энэ систем нь зөвхөн төв зам, томоохон уулзваруудыг бус, гэр хорооллын гудамж, зам, орон сууцны хороолол, нийтийн эзэмшлийн болон хувийн хэвшлийн бүхий л газарт байрлах камерын мэдээллийг нэг цэгээс хянах боломжтой болжээ. Ийнхүү ухаалаг нэгдсэн удирдлагын систем нэвтэрснээр нийтийн хэв журмыг хангах, олон нийтийн аюулгүй байдлыг сайжруулах, гэмт хэрэг зөрчлийг цаг алдалгүй илрүүлэх, түүнтэй тэмцэх үйл ажиллагаанд шинэ түвшний боломж нээгдэж байна.

Энэ нь нийслэлийн иргэдийн аюулгүй, амар тайван амьдрах орчныг бүрдүүлэхэд томоохон түлхэц болохоос гадна хотын аюулгүй байдлын цогц менежментийг хангах шинэ суурь бүтэц болж байгааг албаныхан онцолжээ.

Эх сурвалж: НИТХ