Монгол Улсад Онцгой байдлын алба байгуулагдсаны 20 жилийн ой тохиож буй энэ өдрүүдэд Ерөнхийлөгч У.Хүрэлсүх хүндэтгэлийн арга хэмжээнд оролцлоо. Онцгой байдлын алба нь 2004 онд Гал түймэртэй тэмцэх газар, Улсын иргэний хамгаалалтын газар, Улсын нөөцийн газрыг нэгтгэснээр үүсгэн байгуулагдсан юм.

Төрийн тэргүүн энэ үеэр гамшиг осол, аюул эрсдэлтэй нүүр тулан, ард түмнийхээ амь нас, эрүүл мэнд, эд хөрөнгийг авран хамгаалж ирсэн алба хаагчид, тэдний гэр бүлд талархал илэрхийлж, тангаргаасаа няцалгүй зүтгэж буйг нь онцлон магтав.

Мөн улс орон аюулт үзэгдэл, сорилт бэрхшээлтэй нүүр тулахдаа нэгдмэл сэтгэл, сөрөн тэсвэрлэх чадавхаа бэхжүүлэх шаардлагатайг дурдлаа. Энэ хүрээнд боловсруулж буй “Үндэсний сөрөн тэсвэрлэх стратеги”-г хэрэгжүүлэхэд Онцгой байдлын албаны манлайлал чухал үүрэгтэй гэж үзэж байгаагаа илэрхийлэв.

Судалгаагаар аюулт үзэгдэл, ослын 80 орчим хувь нь хүний болгоомжгүй үйлдлээс үүддэг тул иргэдийг соён гэгээрүүлж, урьдчилан сэргийлэх ажлыг өргөжүүлэх шаардлагатайг Ерөнхийлөгч тэмдэглэсэн юм.

Технологийн шинэчлэлийн хүрээнд хиймэл оюун, нисгэгчгүй нисэх төхөөрөмж, гал унтраагч робот зэрэг шийдлүүдийг эрэн хайх, аврах ажиллагаанд нэвтрүүлэх замаар алба хаагчдын аюулгүй байдлыг хангахыг мөн онцоллоо.

Онцгой байдлын албаны мэдээлснээр, өнгөрсөн 21 жилийн хугацаанд 45 мянга гаруй хүний амь нас, 1.6 их наяд төгрөгийн эд хөрөнгийг хамгаалсан байна. Энэ хугацаанд 8.8 тэрбум төгрөгийг тусгай хувцас хэрэглэлд, 18.7 тэрбум төгрөгийг техник, тоног төхөөрөмжид зарцуулжээ. Үүний үр дүнд хувцасны хангалт 38.2 хувь, техник, тоног төхөөрөмжийн хангалт 44.7 хувь болж өссөн байна.

Цаашид 2025–2028 онд аврах ажиллагааны багаж хэрэгслийн хангалтыг 60 хувь, тусгай зориулалтын хувцсыг 85 хувь, гал унтраах автомашиныг 65 хувь, холбоо зарлан мэдээллийн хэрэгслийг 80 хувьд хүргэх зорилт тавин ажиллаж байна.

Мөн байгаль орчныг хамгаалах чиглэлд Онцгой байдлын байгууллага “Тэрбум мод” үндэсний хөдөлгөөнд нэгдэн 2030 он хүртэл 10 сая мод тарих зорилтыг дэвшүүлжээ.

Эх сурвалж: Монгол Улсын Ерөнхийлөгчийн Тамгын газар.