Эх орныхоо дөрвөн зүгийн хязгаарыг төв цэгтэй нь холбосон 5000 км замыг туулж буй “Таван цэг” төслийн баг өнөөдөр Хөвсгөл аймгийн Мөрөн хотод ирлээ. Ахлах ахлагч Э.Даваажамц ахалсан залуус өнөөдрийг хүртэл далан ес дэх өдөртөө 3772 км зам туулжээ.
Багийнхныг Хөвсгөл аймгийн ИТХ-ын дарга Д.Пүрэвдорж, аймгийн ЗДТГ-ын Цэргийн штабын дарга хурандаа С.Батхуяг, Зэвсэгт хүчний 325 дугаар ангийн алба хаагчдын төлөөлөл угтан авч хүндэтгэл үзүүллээ. Угтах ёслолын үеэр ИТХ-ын дарга Д.Пүрэвдорж хэлэхдээ “Монгол цэргийн тэсвэр, хатуужлыг харуулж буй энэ их зорилго бахархал төрүүлж байна. Залуус олон хүнд үлгэр дуурайл болж байгаад итгэлтэй байна” хэмээн онцлон, багийнханд амжилт хүслээ.
“Таван цэг” багийн гүйлт маргааш Архангай аймгийн чиглэлд үргэлжлэх бөгөөд тэд Хөвсгөл, Архангай, Өвөрхангай, Дундговь, Өмнөговь зэрэг таван аймгийн 23 сумын нутгийг туулж, төслөө дуусгах юм. Тэдний эцсийн цэг нь Монгол Улсын өмнөд хязгаар — Өмнөговь аймгийн Орвог гашууны Бор толгой байх бөгөөд ингэснээр “Таван цэг” төслийн нийт замын 70 гаруй хувь нь ард үлджээ.
Энэхүү тэсвэрийн гүйлт нь эх оронч үзэл, цэргийн тэсвэр тэвчээрийг харуулсан, залууст урам зориг, үлгэр дуурайл болох зорилготой үндэсний хэмжээний чухал төсөл юм.
Эх сурвалж: Хөвсгөл аймгийн ЗДТГ.
