Цагдаагийн байгууллагад өнгөрсөн амралтын өдрүүдэд буюу 06 дугаар сарын 14-16-ны өдрүүдэд зам тээврийн ослын шинжтэй 527 дуудлага, мэдээлэл бүртгэгдсэнээс нэг хүний амь хохирч, 17 хүн гэмтсэн байна.

Тухайлбал, Төв аймгийн Баянчандмань сумын нутаг дэвсгэрт харамсалтай осол гарчээ. Toyota Prius маркийн автомашины жолооч нь замын зорчих хэсэг дээр зогсож байсан Kia-5 маркийн автомашин болон тус тээврийн хэрэгслийн хажууд зогсож байсан зорчигчийг мөргөсний улмаас нэг хүний амь нас хохирсон байна. Уг хэргийг Төв аймгийн Цагдаагийн газар шалгаж байна.

Тухайн ослын шалтгаан нөхцөлийг тогтооход Kia-5 маркийн тээврийн хэрэгслийн жолооч нь адуу дайрч, улмаар ослын улмаас замын зорчих хэсэгт зогссон байжээ. Энэ үед автомашинд зорчиж явсан зорчигч машинаас бууж замын зорчих хэсэгт зогсож байх үед түүнийг өөр тээврийн хэрэгслийн жолооч мөргөж амийг нь хохироосон харамсалтай тохиолдол бүртгэгдсэн байна.

Иймд иргэд, жолооч та бүхэн орон нутгийн замд зорчихдоо тээврийн хэрэгслийн хурдаа тохируулж, үзэгдэх орчин хязгаарлагдсан үед гүйцэж түрүүлэх үйлдэл хийхгүй байх, эрсдэлтэй нөхцөл байдал үүссэн үед зогсоох арга хэмжээ авах боломжтой хурдыг сонгон хөдөлгөөнд оролцохыг Цагдаагийн ерөнхий газраас анхааруулж байна.