Сэлэнгэ аймгийн Зүүнбүрэн сумын “Шинэ гүүр” гэх газарт гарсан харамсалтай хэрэг олон нийтийн сэтгэлийг эмзэглүүлж байна. Зургадугаар сарын 16-ны 19:05 цагт Онцгой байдлын газар “Сэлэнгэ мөрөнд нэг хүүхэд, нэг эрэгтэй хүн живж байна” гэх дуудлага хүлээн авчээ.

Иргэдийн тусламжтайгаар 9 настай хүүг аварсан ч түүнийг аврахаар ус руу орсон Сэлэнгэ аймгийн харьяат 36 настай эрэгтэй иргэн өөрөө живж, амь насаа алдсан байна. Эрэн хайх, аврах алба хаагчид ослын газарт очиж, 20:46 цагт 3 метрийн гүнээс цогцсыг олж гарган авчээ.

Мөн өдрийн 16:26 цагт Дорнод аймгийн Хэрлэн (Сүмбэр) сумын “Дэхт” гэх газраас нэг хүн усанд нас барсан талаар дуудлага ирсэн байна. Тус газарт очсон аврагчид 42 настай эмэгтэй иргэнийг “Хэрлэн” голын уснаас нас барсан байдалтай гаргаж, аймгийн Цагдаагийн байгууллагад шилжүүлэн өгчээ.

СЭРЭМЖЛҮҮЛЭГ:

Онцгой байдлын ерөнхий газраас иргэдийг гол мөрөн, үерийн усны эрсдэлээс сэрэмжлэх, ялангуяа бага насны хүүхдэд тавих хараа хяналтаа сайжруулах, усны хамгаалалтын бүсэд ойртохгүй байх, амьжиргаа мэдэхгүй бол аврах хантаазтай байх зэрэг аюулгүй байдлын зөвлөмжийг чанд мөрдөхийг анхааруулж байна.

Эх сурвалж: ОБЕГ