Нийслэлийн зүгээс ашиглалтын шаардлага хангахгүй орон сууцуудыг үе шаттай буулган, оршин суугчдын амьдрах орчин, орон сууцны чанарыг сайжруулах зорилгоор дахин төлөвлөлтийн томоохон төслийг хэрэгжүүлж эхэллээ. Энэ хүрээнд “Улаанбаатар орон сууцжуулалт” ХХК нийт 15-20 байршилд дахин төлөвлөлт хийх сонгон шалгаруулалтыг зарлаж, анхны гурван компанид батламж гардуулжээ.

Нийслэлийн Засаг даргын Тамгын газрын дарга Д.Амгалан, “Улаанбаатар орон сууцжуулалт” ХХК-ийн гүйцэтгэх захирал З.Төмөртөмөө нар батламжийг гардуулж, төслүүдийг албан ёсоор эхлүүлсэн байна. Тус компани энэ онд багтаан 3000-5000 яндан бүхий хуучин орон сууцуудыг буулгаж, орчин үеийн төлөвлөлт бүхий шинэ барилгуудыг барихаар төлөвлөжээ. Үүнтэй зэрэгцэн иргэдийн аюулгүй, таатай орчинд амьдрах нөхцөл бүрдэхээс гадна дотоодын барилгын компаниудын оролцоог хангаж буй нь эдийн засгийн идэвхжилд эерэгээр нөлөөлөх хүлээлттэй байна.

Батламж гардан авсан компаниуд болон хэрэгжүүлэх төслүүд:

• Чингэлтэй дүүргийн 4 дүгээр хороонд байрлах 6 дугаар орон сууцыг буулган шинээр барих төслийг “Хөх бүрдний эх” ХХК хэрэгжүүлнэ.

• Сонгинохайрхан дүүргийн 18 дугаар хороонд байрлах СТ-4 орон сууцыг дахин барих төслийг “Гартаам агат” ХХК гүйцэтгэнэ.

• Сүхбаатар дүүргийн 6 дугаар хороонд байрлах 22 дугаар орон сууцны барилгыг шинэчлэх төслийг “Хан хөгшин Стэйт” ХХК хариуцан хэрэгжүүлэхээр болжээ.

Эдгээр төслүүд хэрэгжсэнээр хуучин барилгуудын оронд газар хэмнэсэн, чанартай, олон нийтийн аюулгүй байдалд нийцсэн шинэ орон сууцны хорооллууд сүндэрлэх юм.

Эх сурвалж: Нийслэлийн Засаг даргын Тамгын газар – Хэвлэл мэдээлэл, олон нийттэй харилцах хэлтэс.