Улаанбаатар хотод авто замын шинэчлэлтэй зэрэгцэн авто замын хашлагыг байгалийн чулуун хавтангаар шинэчлэх ажил эрчимтэй өрнөж байна. Энэ нь зөвхөн үзэмж сайжруулахаас гадна засвар арчилгааны зардлыг бууруулж, удаан хугацаанд чанараа алдахгүй байх бодит зорилготой шийдэл юм.

Байгалийн чулуун хавтан нь 20-50 жилийн насжилттай бөгөөд цас, бороо, давс, химийн бодис зэрэгт элэгдэж, бутардаггүй, өнгө, хийцээ удаан хадгалдаг онцлогтой. Ийм төрлийн хашлагыг өмнө нь 2002 онд Бага тойрууд, 2007 онд Энхтайваны өргөн чөлөөнд ашиглаж байсан бөгөөд өнөөдрийг хүртэл хэлбэр хийцээ алдалгүй хэвээр байгааг мэргэжилтнүүд онцолж байна.

Харин бусад байршилд ашигласан бетон хашлага богино настай, тогтмол эвдэрч, арчилгаа шаарддаг нь тодорхой болжээ. Тухайлбал, Дарь-Эх, Улиастай, Гачуурт чиглэлийн авто замууд дээр хийгдсэн бетон хашлагуудын зарим нь нэг жилийн дотор бутарч, зарим газраа бүр хашлагагүй болсон байна. Үүний шалтгаан нь бетон хольцын найрлага, суурилуулалтын технологийн алдаа, цаг уурын нөлөө зэрэгтэй холбоотой аж.

2024 онд нийт 62 байршилд авто зам шинэчлэхдээ байгалийн чулуун хашлага суурилуулсан нь анхны бодит үр дүнгээ өгч эхэлжээ. Хотын авто замын хашлага тасралтгүй сөхөгдөж, эвдэрч, нөхөж засах шаардлагатай асуудалд удаан хугацаанд бодит шийдэл болж байгаа гэдгийг Замын хөгжлийн газрын дарга Б.Одбаяр болон авто замын мэргэжилтнүүд онцолж байна.

Ирэх жилүүдэд байгалийн чулуун хавтанг авто замын хашлагад түлхүү ашигласнаар нийслэлийн авто замын засвар, арчилгааны зардал багасч, замын аюулгүй байдал, үзэмж сайжрах боломжтой гэж үзэж байна.

Эх сурвалж: Нийслэлийн Засаг даргын Тамгын газар – Хэвлэл мэдээлэл, олон нийттэй харилцах хэлтэс.