Монгол Улсын Засгийн газраас хэрэгжүүлж буй “Оюутан цэрэг” сургалт энэ жил 10 дахь удаагаа зохион байгуулагдаж байна. Анх 2014 онд эхэлсэн тус хөтөлбөр нь залуу үеийнхэнд цэргийн анхан шатны мэдлэг, чадвар олгож, эх оронч үзэл төлөвшүүлэх зорилготой бөгөөд цар тахлын жилүүдэд түр завсарласан ч нийтээрээ амжилттай үргэлжилсээр байна.

Энэ жил шинэчилсэн журмын дагуу “Оюутан цэрэг” сургалтад их, дээд сургуулийн нэгдүгээр дамжаанаас гуравдугаар дамжааны оюутнууд хамрагдаж буй нь онцлог бөгөөд хамрах хүрээг тэлсэн, илүү хүртээмжтэй зохион байгуулалт болсныг онцолж байна. Сургалтын хүрээнд оюутнуудад цэргийн зохион байгуулалт, сахилга бат, байлдааны болон мэргэжлийн бэлтгэл олгох төдийгүй, өөрийгөө удирдах, хамт олонч байдалд сургах зэрэг нийгмийн боловсрол ч давхар олгогддог.

Зэвсэгт хүчний Хуурай замын цэргийн ангинууд тус сургалтыг хариуцан зохион байгуулж байгаа бөгөөд 014, 120, 326 дугаар ангиуд оюутнуудыг эхний ээлжид хүлээн аваад байна. Үүнээс гадна аймгуудын хэмжээнд буюу Дорнод, Өвөрхангай, Өмнөговь, Орхон, Ховд, Төв, Дорноговь аймгуудад харьяа ангиудын сургалтын төвүүд дээр бүсчилсэн байдлаар сургалтыг явуулж байгаа нь орон нутгийн оюутнуудад ч хамрагдах боломжийг олгож байна.

“Оюутан цэрэг” хөтөлбөр нь сүүлийн арван жилийн хугацаанд олон мянган залуусыг хариуцлагатай, сахилга баттай, нийгэмд үлгэр дуурайл болохуйц эх оронч иргэн болгон төлөвшүүлэхэд үнэтэй хувь нэмэр оруулсан үндэсний хэмжээний бодлогын хөтөлбөр болоод байна.

Эх сурвалж: Батлан хамгаалах яам