Морьт харвааны спортоор олон жил ажилласан нэгэн уяач, багшийн 18 адууг алаад махалчихсан тухай мэдээ олон нийтийг цочирдуулж байна. Тэрбээр уг хүлгүүдээ долоон жилийн турш өөрийн гараар өсгөн, сургаж, хүүхэд залуусыг монгол өв соёлд дурлуулах зорилгоор ашиглаж иржээ.

Эдгээр морьд нь зөвхөн уяачийн хувийн өмч төдийгүй, морьт харвааны спортын хөгжил, үндэсний өв соёлын сурталчилгаанд үнэтэй хувь нэмэр оруулж байсан гэдгийг морьдын эзэн онцолж, “Олон ээж, аавын хүүхдүүдийг монгол ахуй, өв соёлд сургаж, морь унах, эдлэх соёлд дурлуулж, олон тамирчдыг төрүүлж байсан хүлгүүдийг маань бүгдийг нь алж, махалсан байна. Энэ бол зүгээр нэг хулгайн хэрэг биш, Монгол соёл, спортын эсрэг хийсэн ноцтой хохирол юм” хэмээн бичжээ.

Уг үйлдэл зөвхөн эдийн засгийн төдийгүй, сэтгэл санааны асар их хохирол учруулж байгаа бөгөөд монголчуудын уламжлалт өв соёл, бахархлыг илтгэх морьт харвааны хүлгүүд ийнхүү устгагдсан нь олон нийтийн дунд бухимдал, харамслыг дагуулж байна.

Хэргийг холбогдох хууль, хяналтын байгууллага шалгаж эхэлсэн эсэх нь одоогоор тодорхойгүй байна. Гэвч ийм төрлийн хэрэг гарах бүрт, монгол адууны үнэ цэнэ, өв уламжлалын хамгаалалт ямар дорой байгааг харуулж байна.