1995 онд тухайн үеийн УИХ-аас тогтоол гаргаж, жил бүрийн 10 дугаар сарын 29-нийг нийслэлийн өдөр болгож тэмдэглэж ирсэн. Мөн наймдугаар сарын эхний долоо хоногийн амралтын өдрүүдэд Хүрээ цам-Даншиг наадмыг хийдэг болоод байгаа.
Тэгвэл дээрх хоёр наадмыг нэгтгэж, зургаадугаар сарын сүүлийн долоо хоногийн амралтын өдөр тэмдэглэхээр болсон байна. Нийслэлийн өдөр буюу “Хүрээ цам-Даншиг наадам” энэ сарын 28, 29-ний өдрүүдэд Хүй долоо худагт болох аж. Даншиг наадамд гурван насны морь уралдаж, 256 бөх зодоглоно. Түүнчлэн Монголын сурын холбооны тамирчид цэц мэргэнээ сорихоор мэдүүлгээ өгчээ. Иргэдэд зориулан Хүй долоо худаг руу тогтмол цагт автобус үйлчлэх юм байна.
“Хүрээ цам-Даншиг наадам” 2025 наадмын нээлтийг МУУГЗ Б.Алтанхуяг найруулахаар болжээ. Мөн даншиг наадмын төсөв хөрөнгийн талаар Хотын дарга Х.Нямбаатар дараах мэдээллийг өгсөн байна.
Нийслэлийн засаг дарга бөгөөд Улаанбаатар хотын захирагч Х.Нямбаатар:
-"Нийслэлийн орлогын тодорхой хувийг аялал жуулчлалаас олдог. Ийм учраас нийслэлийн өдөрт ач холбогдол өгч байгаа. “Хүрээ цам-Даншиг наадам” хотын эдийн засгийг тэтгэнэ гэх тооцоолол хийсэн. Энэ жилийн “Хүрээ цам-Даншиг наадам”-д улсын баяр наадмаас илүү мөнгө төсөвлөнө” гэжээ.
