Өнөөдөр буюу зургаадугаар сарын 12-нд дэлхий нийтээр Хүүхдийн хөдөлмөрийн эсрэг дэлхийн өдрийг 23 дахь жилдээ тэмдэглэж байна. 2025 оны хувьд “Энэ жил ахиц гаргасан ч ахиад урагшлахад хүчээ нэмье” гэсэн уриан дор дэлхийн улс орнууд хүүхдийн хөдөлмөрийн асуудалд шинэчлэх, бодитой алхам хийхийг уриалж байна.
Манай улс энэхүү өдрийг 2005 оноос албан ёсоор тэмдэглэж ирсэн бөгөөд Олон улсын хөдөлмөрийн байгууллагын 182, 138, 29 дүгээр конвенцуудад нэгдэн орсон улс юм. Түүнчлэн 2021 онд шинэчлэгдэн батлагдсан Хөдөлмөрийн тухай хуулиар хүүхдийн хөдөлмөрийг хориглох, түүний тэвчишгүй хэлбэрүүдийг устгахыг хуулиар зохицуулсан. Үүнд:
-
Насанд хүрээгүй хүнийг ажиллах хүч нийлүүлэх гэрээгээр ажиллуулахыг хориглох
-
Оюун ухаан, биеийн хөгжил, амь нас, ёс суртахуунд сөргөөр нөлөөлөх хөдөлмөрөөс ангид байлгах
-
Мөлжлөг, шударга бус цалин хөлс, хууль бус үйл ажиллагаанд хүүхдийг ашиглахыг хориглох зэрэг багтсан.
Мөн 2024 оны есдүгээр сарын 1-нээс хэрэгжиж эхэлсэн Хүүхэд хамгааллын тухай хуулийн шинэчилсэн найруулгаар хүүхдийн эрхийг хянах улсын байцаагчийн тоог нэмэгдүүлж, үүрэг хариуцлагыг тодорхой болгосон байна. Энэ нь хүүхдийн эрхийн зөрчлийг эрт илрүүлж, таслан зогсоох чадавхыг нэмэгдүүлэхэд чиглэсэн бодит алхам юм.
Судалгаагаар өнөөгийн байдлаар улсын хэмжээнд аюултай хөдөлмөр эрхэлж буй 60 орчим мянган хүүхэд байгаа бөгөөд тэдний талаас илүү хувь нь амьжиргааны доогуур түвшний өрхийн хүүхдүүд аж. Эдгээр хүүхдүүдийн ихэнх нь хурдан морины уяа сойлго, мал маллах, газар тариалангийн машин механизмтай холбоотой ажлуудад оролцож байна. Барилга угсралтын салбарт ч хүүхдийн хүчийг ашиглаж буй тохиолдол байсаар байгаа нь ноцтой асуудал юм.
Монгол Улс 2016 оноос эхлэн хүүхдийн хөдөлмөрийн тэвчишгүй хэлбэрийг бүрэн устгах олон улсын зорилтыг хэрэгжүүлэхэд бодит оролцоотой ажиллаж байгаа бөгөөд энэ хүрээнд хууль эрх зүй, хяналт, хамгааллын тогтолцоог шат дараатай сайжруулж байгаа нь хүүхдийн эрхийг хамгаалах чиглэлд ахицтай алхам болж байна.
Эх сурвалж: Хөдөлмөр, нийгмийн хамгааллын яам, Олон улсын хөдөлмөрийн байгууллага.
