Арвайхээр хот энэ зун аялал жуулчлал, соёлын олон улсын болон бүс нутгийн хэмжээнд чухал ач холбогдолтой үйл ажиллагаануудыг дараалан зохион байгуулахаар бэлтгэж байна. Ирэх долдугаар, наймдугаар сард тус хотод дараах томоохон эвентүүд болох бөгөөд энэ нь нутгийн иргэд, хувийн хэвшил, жуулчид, соёл, спортын салбарын төлөөлөгчдийг нэгэн дор цуглуулах чухал боломж юм.

• 7-р сарын 10, 11 – Өвөрхангай аймгийн төрийн баяр наадам

• 7-р сарын 18, 19 – Морь сонирхогчдын хүсэн хүлээдэг "Horse Festival" буюу Адууны баяр

• 7-р сарын 20 – УАЗ-469 автомашины улсын аварга шалгаруулах уралдаан "Соёмбо мастер кросс"

• 7-р сарын 24 – Монгол туургатны ерөөлч магтаалчдын олон улсын уралдаан

• 7-р сарын 25 – Өндөр гэгээний 390 жилийн ойн хүрээнд шашин номын арга хэмжээ

• 7-р сарын 26, 27 – Өндөр гэгээний ойд зориулсан Хангайн бүсийн их хурд, Даншиг наадам

• 8-р сарын 1, 2 – Авто тээврийн салбарын 100 жилийн ой

Эдгээр арга хэмжээг Засгийн газраас томилогдсон ажлын хэсэг, Улаанбаатар дахь Нутгийн зөвлөл, мэргэжлийн холбоод, аймаг, сумдын хамтын ажиллагаагаар зохион байгуулж буй бөгөөд энэ нь зөвхөн төрийн бус, мөн хувийн хэвшлийг ч дэмжиж буй томоохон жишээ гэж хэлж болно.

Аймгийн Засаг дарга О.Пүрэвдоржийн хэлснээр “Арвайн тал” хэмээх байршилд эрүүл ахуйн шаардлага хангасан гэр баазуудыг байгуулж, жуулчид, зочдыг тав тухтай хүлээн авах бэлтгэлийг иргэдийн оролцоотойгоор хийж байна. Энэ нь бүс нутгийн эдийн засагт эерэг нөлөө үзүүлж, аялал жуулчлалын орчныг илүү соёлч, аюулгүй, дэмжихүйц түвшинд хүргэх алхам юм.

Эх сурвалж: Өвөрхангай аймгийн ЗДТГ