Чингэлтэй, Сүхбаатар дүүргийн нутаг дэвсгэрт хамрах 158 га талбайд хэрэгжих “Сэлбэ 20 минутын хот” хөтөлбөрийн бүтээн байгуулалт өнгөрсөн сард албан ёсоор эхэлжээ. Уг төслийг нийслэлийн жишиг болгон хэрэгжүүлж буй бөгөөд 2206 нэгж талбайг хамруулсан энэ ажлын хүрээнд хувийн хэвшлийн оролцоог нээлттэй байдлаар уриалан дуудаж байна.

Төслийн хүрээнд “Сэлбэ 20 минутын хот” корпорацаас олон нийт, аж ахуйн нэгжүүдээс хамтран ажиллах саналыг албан ёсны selbecity.mn вэб сайтаар дамжуулан 2025 оны зургаадугаар сарын 9-нөөс эхлэн 10 хоногийн хугацаанд хүлээн авч буйг тус корпорацын гүйцэтгэх захирал У.Баатар онцлов. Төслийн 26 байршилд хамрагдах 41 га газрыг эдийн засгийн эргэлтэд оруулах зорилгоор бизнесийн хувьд ашигтай байршлыг санал болгон, хамтын ажиллагааны журмыг боловсруулж эхэлжээ.

“Сэлбэ” дэд төв нь нийт 45610 иргэнд зориулсан нийгэм, соёлын цогц үйлчилгээг нэг дор төвлөрүүлсэн, анхны жишиг 20 минутын хот байхаар төлөвлөгдсөн. Үүнд:

• 10 мянган өрхийн 113 орон сууц

• 18 км урт авто зам, 43 км явган зам, 28 км дугуйн зам

• 3.6 га тоглоомын талбай, гурван сургууль, таван цэцэрлэг, эмнэлэг, спортын байгууламж

• Мөн нийт талбайн 40 хувийг ногоон байгууламж эзлэхээр төлөвлөсөн байна.

Энэхүү төслийн гол зорилго нь иргэдэд амьдралын гол үйлчилгээг 20 минутын дотор авах боломж бүхий дэд бүтцийг бүрдүүлэх бөгөөд олон улсын жишигт нийцсэн, тогтвортой хот байгуулалтын шинэ загвар байхыг зорьж байна.