Жолооч таны гар утсанд замын хөдөлгөөний дүрэм зөрчсөний талаар хиймэл оюун ухаанаар илрүүлсэн тухай анхааруулга мессеж ирсэн үү? Энэ нь замын хөдөлгөөний удирдлагын төвөөс (ЗХУТ) хийж буй шинэ туршилтын системийн хүрээнд илгээж буй мэдээлэл юм. Одоогоор энэхүү мессеж нь сануулга шинжтэй бөгөөд ямар ч торгууль ноогдуулахгүй байна.
Системийг хөгжүүлэх, хиймэл оюун ухаанд зөрчлийг зөв таних чадвар суулгах ажлыг шат дараатай хийж байгаа бөгөөд алдаа гарсан тохиолдолд иргэдийн зүгээс өгсөн мэдээлэл нь суралцах процессод нэмэр болохыг албаныхан онцолжээ.
Одоогийн байдлаар гэрлэн дохио зөрчих, эгнээ байр буруу эзлэх, зогсох шугам давж зогсох, урсгал сөрөх зэрэг зөрчлийг илрүүлэн жолоочид мессежээр анхааруулга илгээж байгаа юм. Гэхдээ цагдаа зохицуулалт хийж байгаа үед илрүүлсэн зөрчлийг тухайн жолооч руу илгээхгүй байхаар системийг сайжруулж байна.
Иргэдийн дунд түгээмэл гарч буй зөрчилд давхар эгнээ эзэлж эргэх, цагаан шугам давах, чиглэлийн тэмдэглэгээ зөрчих зэрэг багтдаг бөгөөд зарим жолооч үүнийг системийн алдаа мэтээр ойлгон гомдол гаргаж байгаа нь ажиглагдаж байна. Тиймээс хиймэл оюун ухааныг илүү нарийвчлалтай болгоход иргэдийн мэдээлэл ихээхэн тус болдог гэж мэргэжилтнүүд онцолж байна.
Харин цаашид зөрчлийг бүртгэх, мэдээллийг жолооч руу илгээх үйл явц ачааллаас шалтгаалан нэг хоногийн дараа ч очиж болзошгүйг анхааруулж байгаа бөгөөд энэ нь туршилтын үеийн хэвийн үзэгдэл гэжээ.
Технологийн нэвтрүүлэлт нь зөвхөн зөрчил илрүүлж торгох бус, урт хугацаандаа жолоочийн соёлыг дээшлүүлж, замын түгжрэлийг бууруулах чухал ач холбогдолтой юм. Одоогоор Улаанбаатар хотын 176 байршилд ухаалаг камер суурилуулаад байгаа бөгөөд системийг 2025 оны 1 дүгээр сарын 1-нээс бүрэн хүчинтэй ажиллуулах төлөвлөгөөтэй байна.
Хиймэл оюун ухааныг авто замын хяналтад нэвтрүүлснээр замын хөдөлгөөний үр нөлөөг мэдэгдэхүйц сайжруулж чадсан улс орнуудын жишээ ч байна. Сингапурт гэхэд авто ослын эрсдэл 22 хувиар буурсан бол Их Британи, Хятад, Австрали зэрэг улсад замын зөрчил болон ачаалал 15–30 хувиар буурсан эерэг үзүүлэлт гарчээ.
