НИТХ 2024 оны арванхоёрдугаар сард автомашины албан татварыг гурав дахин нэмэгдүүлэх шийдвэр гаргасан нь олон нийтийн дунд маргаан дагуулсаар байна. Тус шийдвэрийг батлахдаа Нийслэлийн ИТХ нь олон нийтийн саналыг хэрхэн тусгасан бэ гэдэг асуудлыг УИХ-ын Төсвийн байнгын хорооны хуралдаанд гишүүд хөндлөө.

Одоогийн байдлаар авто тээврийн хэрэгслийн албан татварыг төлж буй 790 мянган эзэмшигч байгааг онцолсон гишүүд “тэдгээр хүмүүсийг ердөө хоёр иргэн төлөөлсөн гэх тайлбар үнэнд нийцэх үү?” гэсэн асуултыг тавьсан юм. Санал асуулгын тухайд 2024 оны арваннэгдүгээр сарын 20-нд Хүүхдийн ордонд зохион байгуулсан хэлэлцүүлэгт есөн дүүргээс 242 иргэн оролцсон. Харин цахимаар байршуулсан хэлбэрээр хоёрхон иргэн санал илэрхийлсэн гэж албаныхан тайлбарлажээ.

НЗДТГ-ын зүгээс энэ татварыг нэмэгдүүлсэн шалтгааныг авто замын засвар, үйлчилгээний зардлыг санхүүжүүлэх шаардлагатай холбон тайлбарласан. Гэвч УИХ-ын гишүүд уг шийдвэр нь хангалттай төлөөлөлгүйгээр гарсан, мөн хууль тогтоомжийн хэрэгжилтийн явцад процессын алдаа гарсан эсэхийг хянан шалгах шаардлагатай гэж үзэж байна.

Хуулийн дагуу УИХ нь ИТХ-ын шийдвэрийг цуцлах буюу шууд дүгнэлт өгөх эрхгүй ч тухайн шатны Засаг дарга нь ИТХ-ын шийдвэрт хориг тавих, эсвэл ИТХ өөрөө шийдвэрээ дахин авч үзэх боломж хуулиар нээлттэй. Энэ хүрээнд Төсвийн байнгын хорооны зарим гишүүн уг шийдвэрийн хууль зүйн үндэслэлд дүгнэлт хийх, шаардлагатай бол Засгийн газарт чиглэл өгөх хэрэгтэй гэсэн байр суурь илэрхийлж байна.

Цаашид автомашины татварын асуудлаар хоёр хувилбар яригдаж байна. Нэгдүгээрт, Засгийн газарт тодорхой чиглэл өгөх тухай тогтоолын төсөл хэлэлцэх. Хоёрдугаарт, энэ асуудлыг процессын хувьд алдаа гарсан эсэхийг судлах ажлын хэсэг байгуулах. Эдгээр хувилбарыг Тамгын газраас дүгнэлт гаргуулсны дараа үргэлжлүүлэн хэлэлцэхээр тогтжээ.

Улмаар авто тээврийн болон өөрөө явагч хэрэгслийн албан татварын тухай хуулийн хэрэгжилт, нийслэлийн шийдвэрийн хуульд нийцэх эсэхэд Засгийн газраас дүн шинжилгээ хийж, боловсронгуй болгох санал, дүгнэлт гаргах шаардлагатай гэж УИХ-ын Төсвийн байнгын хорооны гишүүд үзэж байна.

Эх сурвалж: Parliament.mn, НЗДТГ