МАН-ын Удирдах зөвлөл, УИХ дахь намын бүлэг Г.Занданшатарыг Ерөнхий сайдад нэр дэвшүүлжээ. Мөн УИХ дахь намын бүлэг нь УИХ дахь холбогдох байнгын хороод болон чуулганы нэгдсэн хуралдаанд нэр дэвшигчээ дэмжих үүрэг хүлээв.
Л.Оюун-Эрдэнийн араас унагасан "нулимс" хаттаж амжаагүй байхад дараачийн Ерөнхий сайдын нэр тодров. Хаа очиж ар өврөөсөө татлаагүй, хар пиарт оногдоогүй, нийтийн дунд нүүрээ барчихаагүй нэр цэвэр улстөрч, туршлагатай парламентчийг нэр дэвшүүлэхээр болсон нь энэ удаад МАН-ын олз болов. Дөрвөн ч удаа парламентад сонгогдож, хоёр сонгууль дамжин УИХ-ын даргаар ажилласан, гүйцэтгэх засаглалд мөн гурван удаа томилогдож, салбар хариуцсан сайд, ЗГХЭГ-ын даргаар ажилласан. Мэргэжил, боловсролын хувьд өмнөх Ерөнхий сайдтай харьцуулахын аргагүй, ядаж л диплом нь үнэн.
Хувь хүний зан төлөвийн хувьд аливаа асуудалд голч ханддаг, нийгэмд гал ноцоосон элдэв дуулианд оролцоод, өрдөөд байхааргүй, төвийг сахисан байр суурьтай. Энэ утгаараа парламент дахь цөөнх буюу сөрөг хүчинтэйгээ хэл амаа ололцоод явах боломжтой. Парламентад ажилласан туршлага, улс төрийн замналын хувьд ч одоогийн УИХ дотор хамгийн өндөр байр суурьтай, хүлээн зөвшөөрөгдсөн улстөрч.
Товчхондоо, "Л.Оюун-Эрдэнийг огцруулчихвал төр хямарна, засаг тогтворгүйтнэ, ордны хуйвалдаан улсаа хөмөрлөө" гэх мэт айдас хүйдэст автуулсан сурталчилгаа, хар пиарт хариу өгөхөөр хэмжээний улстөрч Ерөнхий сайдад нэр дэвшлээ. Өмнөх парламентын үед Л.Оюун-Эрдэнэтэй ҮАБЗ-д багтаж, нам талаасаа нэг баг болж ажиллаж байсан. Энэ талаас нь харсан ч хамтарсан Засгийн газрын дэвшүүлсэн зөв зүйтэй бодлогуудыг нураачих, тараачих хэмжээний муйхар хүн биш. Хамтарсан Засгийн газар унаж, гурван намын байгуулсан гэрээ цуцлагдсан ч гэлээ дөрвөн жилийн хугацаанд дэвшүүлсэн мөрийн хөтөлбөр нь үргэлжлэх баталгааг шинэ Ерөнхий сайд хувьдаа гаргах болов уу.
Гэхдээ энэ нь АН, эсвэл ХҮН Засгийн газарт багтана гэсэн үг биш юм. АН-ын даргын хувьд "МАН-тай засгийн газарт хамтрахгүй" гэдгээ эрт хэлсэн. Учир нь АН-ыг хамтарсан Засгийн газраас гаргах шийдвэрийг Л.Оюун-Эрдэнэ биш, намын эрх барих дээд байгууллага буюу МАН-ын Бага хурал гаргасан. Тийм болохоор энэ асуудлыг Бага хурлаар дахин хэлэлцэх боломжгүй гэсэн үг. Гэсэн хэдий ч хамтарсан Засгийн газрын дэвшүүлсэн мөрийн хөтөлбөр, эдийн засгийн том бодлогуудыг хэрэгжүүлэх, эхлүүлсэн ажлаа дуусгахад парламент дотроос дэмжиж ажиллана гэдгээ Л.Гантөмөр дарга товч бөгөөд тодорхой хэлсэн. Учир нь энэ хэмжээний том бодлогыг дахин дэвшүүлэх нам, Засгийн газар гарахгүй биз. Энэ бол улс төрийн намууд богино хугацаанд боловч хамтарч, улс орны нийтлэг эрх ашиг гэдэг нэг зүйл дээр төвлөрч чадсаны хүч юм. Улс төрд, парламентад дахиад ийм хэмжээний хүчний төвлөрөл үүсэх нь юу л бол. Ялангуяа МАН-ын Бага хурлын сүүлд гаргасан шийдвэрийн дараа. Тиймээс шинэ Ерөнхий сайдын хувьд хамтарсан Засгийн газрын боловсруулсан бодлого, дэвшүүлсэн мөрийн хөтөлбөрөөс нэг их хазайхгүй байх.
Харин ХҮН, ИЗНН, "Үндэсний эвсэл"-ийн дарга Н.Номтойбаяр нарын хувьд асуудал арай өөрөөр яригдаж магадгүй. Жижиг намуудын хувьд эрх барих хэмжээний суудал парламентад авч чадахгүй гэдгээ нэгэнт ухамсарлаж байгаа учраас АН-ын үлдээсэн орон зай дээр тоглолт хийх, тамга атгаж, төсөв захирах хэмжээнд нэг удаа ч болов хүрэх, ядаж л CV-гээ ахиулах хүсэл, ашиг сонирхол байх нь зайлшгүй. Харин үүн дээр парламентын олонхи шийдвэрээ гаргана. МАН-ын бүлгийн гишүүдийн хувьд бол "дангаараа засаглана" гэдэг дээрээ зогсох болов уу. Л.Оюун-Эрдэнийг огцруулах шийдвэрт хүрсэн нь ч гэсэн /нууц санал хураалтаар МАН-ын бүлгийн 68 гишүүний 24 нь Засгийн газрынхаа эсрэг санал өгсөн/ ямар нэг хэмжээгээр үүн дээр үндэслэсэн байж таарна.
Ямартай ч наадмын өмнө шинэ Засгийн газар бүрдэж, монголчууд уужуу тайван наадаж болохоор боллоо. Улс гэр гэдэг айл зөвхөн нэг хүний /жишээ нь МАН-ын даргын/ нуруун дээр тогтдоггүй, нэг хүн явснаар төр хөмөрчихдөггүй гэдгийг харуулах шинэ томилгоо эхэллээ.
Б.СЭМҮҮН
