Монгол Улсад хууль тогтоомжийг удаа дараа зөрчиж, төрийн албан хаагчдын үйл ажиллагаанд саад учруулсан Шведийн иргэн Камбаза Селестэ (Cambaza Celeste)-г өчигдөр тус улсын нийслэл Стокгольм хот руу хуяглан хүргэж, харьяалах улсынх нь хууль, хяналтын байгууллагад хүлээлгэн өгсөн талаар Гадаадын иргэн, харьяатын газраас мэдээллээ.

Энэхүү иргэн нь Швед улсад гэмт хэрэгт холбогдож байсан төдийгүй Монгол Улсад байх хугацаандаа виз, оршин суух зөвшөөрлийн хугацаагаа хэтрүүлсэн зөрчил гаргасан байна. Түүнчлэн түүнийг Монгол Улсаас гаргах ажиллагааг хэрэгжүүлэхэд олон удаа санаатай саад учруулж, хууль ёсны шаардлагыг үл биелүүлэн:

• төрийн албан хаагчдад хэл амаар доромж үг хэлэх,

• бие махбодид нь халдах,

• тээврийн хэрэгслээс зугтах зэрэг үйлдлийг удаа дараа гаргаж,

• өөрийн болон бусдын амь нас, эрүүл мэндэд бодит эрсдэл учруулсан байна.

Тиймээс Зөрчлийн тухай хуулийн дагуу торгуулийн шийтгэл оногдуулж, Гадаадын иргэний эрх зүйн байдлын тухай хуулийн дагуу Монгол Улсад хоёр жилийн хугацаанд дахин нэвтрэхийг хориглох шийдвэр гарган, албадан гаргасан байна.

Энэхүү ажиллагааг олон улсын хууль, журмын хүрээнд хэрэгжүүлж, түүнийг хуулийн дагуу харьяалах улсад нь шилжүүлэн өгсөн гэж ГИХГ тодотгожээ.

Эх сурвалж: ГИХГ