ЦССҮТ болон JCI Конгресс салбар байгууллага хамтран “One drop One life” төслийн хүрээнд “Хүүхдийн хөгжлийн өрөө”-г нээлээ. Цусны донорын дэлхийн өдрийг угтан хэрэгжүүлж буй энэхүү санаачилга нь донорын үйл ажиллагаанд эцэг эхчүүдийн оролцоог нэмэгдүүлэх, нийгмийн сайн сайхны төлөөх үйлсэд хүүхэдтэй иргэдийн оролцоог хөнгөвчлөх зорилготой юм.
Энэхүү өрөөгөөр дамжуулан хүүхдээ харах хүнгүйгээс болж цусаа өгөх боломжгүй байсан олон хүн донорын үйл ажиллагаанд чөлөөтэй оролцох боломжтой болж байна. Өрөө нь хүүхдүүдийн хөгжилд нийцсэн орчин бүхий сэтгэхүй хөгжүүлэх оньсон тоглоом, танин мэдэхүйн ном, амрах булантай. Донорууд тайван байдлаар цусаа өгч байх зуур хүүхдүүд нь аюулгүй, тав тухтай орчинд тоглож, хөгжих нөхцөл бүрдсэн.
JCI Конгресс байгууллагын 2025 оны Ерөнхийлөгч Э.Дулмаа хэлэхдээ: “Хүүхдээ хараад гэрээсээ гарч чаддаггүй эцэг эх олон. Бид энэ өрөөг нээсэн нь тэдний сайн санааны үйлсийг дэмжих нэг алхам юм. Донорууд маань хүүхдээ үлдээгээд, санаа зовох зүйлгүйгээр цусаа өгөх боломжтой боллоо” хэмээн онцоллоо.
Өдөрт дунджаар 20-30 хүүхэд хүлээн авах хүчин чадалтай тус өрөө нь зөвхөн доноруудын төдийгүй нийгмийн сэтгэл зүй, хүмүүнлэгийн орчныг сайжруулахад үнэтэй хувь нэмэр оруулна хэмээн үзэж байна.
Эх сурвалж: ЦССҮТ, JCI Конгресс.
