Нийслэлийн хэмжээнд нийт 15 байршилд явган хүний замыг байгалийн чулуун хавтангаар шинэчлэх ажил үргэлжилж байна. Уг ажлын хүрээнд стандартын шаардлага хангасан байдал, хөдөлмөрийн болон замын аюулгүй байдалд Нийслэлийн Хяналт шалгалтын газар хяналт тавьж ажиллаж байна.
Өнөөдөр Чингэлтэй дүүргийн 1 дүгээр хороо, Мөнгөн завьяа орчмын явган замын ажлын явцтай Нийслэлийн Хяналт шалгалтын газрын дарга С.Энхбаяр болон холбогдох албаныхан газар дээр нь танилцлаа. Тус байршилд "Сант-Өндөр" ХХК ажил гүйцэтгэж байгаа бөгөөд 600х300х400 мм хэмжээтэй байгалийн боржин чулуун хавтанг ашиглаж байна. Үүнтэй зэрэгцэн цахилгаан, холбооны кабелийг газар доогуур шургуулан оруулах ажлыг давхар хийж буйг тус компанийн талбайн инженер онцолжээ.
НХШГ-ын дарга С.Энхбаяр: “Явган хүний зам шинэчлэх ажлыг гүйцэтгэж буй компаниуд гэрэлтүүлэг бүхий хамгаалалтын хашаа барих, аюулгүйн тэмдэг тэмдэглэгээ байрлуулах, ажилчдын аюулгүй байдлыг хангах үүрэгтэй. Мөн иргэдийн зорчих хэсэгт шороо асгахгүй байх, тав тухтай, аюулгүй нөхцөлийг бүрдүүлэх хэрэгтэй” хэмээн онцоллоо.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс
