Баянзүрх дүүргийн 13 дугаар хороонд байрлах 172 дугаар цэцэрлэгт 150 хүүхдийн ор бүхий шинэ өргөтгөлийн барилга ашиглалтад орж, улсын комисс хүлээн авчээ. Тус цэцэрлэг нь өмнө нь дөрвөн бүлэгт нийт 200 орчим хүүхэд хүлээн авч үйл ажиллагаа явуулж байсан бол энэхүү өргөтгөл ашиглалтад орсноор нэмэлтээр зургаан бүлэг нээж, нийт 350 гаруй хүүхдийг хүлээн авах хүчин чадалтай болж байна.
Улсын төсвийн хөрөнгө оруулалтаар баригдсан шинэ өргөтгөл нь 1159.4 ам метр талбайтай, зоорь бүхий хоёр давхар барилга бөгөөд үндсэн барилгатай хүзүүвч холболтоор нэгдсэн бүтэцтэйгээр зохион байгуулагджээ. Энэ нь тус цэцэрлэгийн сургалтын орчныг сайжруулж, хүүхдийн ачааллыг бууруулах, хүртээмжийг нэмэгдүүлэхэд чухал дэмжлэг болж байна.
Шинэ өргөтгөлтэй болсноор тус цэцэрлэгт хамрагдах хүүхдийн тоо нэмэгдэхийн сацуу, орчин үеийн стандарт шаардлагад нийцсэн анги танхим, ариун цэврийн байгууламж, тоглоомын орчин бүрдсэн нь сургалтын чанар, хүүхдийн аюулгүй байдал, эрүүл мэндийн орчныг сайжруулах бодит алхам боллоо.
Эх сурвалж: Нийслэлийн Баянзүрх дүүргийн ЗДТГ
