Нийслэлийн Засаг даргын нэгдүгээр орлогч Т.Даваадалай болон холбогдох албаныхан Хан-Уул дүүргийн 12 дугаар хорооны Морингийн даваанд байрлах “Хог хаягдлын ландфил байгууламж, барилгын хатуу хог хаягдал дахин боловсруулах үйлдвэр”-ийн талбайд ажиллаж, үйлдвэртэй танилцлаа.

Уг үйлдвэр нь өдөрт 150 тонн барилгын хатуу хог хаягдал хүлээн авч буталж, дахин боловсруулан ангилах хүчин чадалтай бөгөөд нийт 8.5 сая тонн хог хаягдлыг хүлээн авах чадамжтай. Монгол Улсын хэмжээнд барилгын хог хаягдлыг дахин боловсруулах цорын ганц үйлдвэр гэдгээрээ онцлогтой тус байгууламж нь эрүүл ахуйн шаардлага хангасан ландфилл, ангилан боловсруулах талбай, машин техник, оффисын хэсгээс бүрддэг.

Нийслэлийн хэмжээнд жилд дунджаар 1.6 сая тонн хог хаягдал төвлөрсөн гурван хогийн цэгт хуримтлагддаг бөгөөд одоогоор зөвхөн 11.4 хувь нь дахин боловсруулагдаж, 88.6 хувийг нь булж устгаж байгаа. Энэ нийт хаягдлын 20-30 хувийг барилгын хог эзэлдэг гэдгийг орлогч Т.Даваадалай онцлон дурдав.

Тэрээр хэлэхдээ, “Хатуу хог хаягдлыг боловсруулж, хайрга дайрга болгон эдийн засгийн эргэлтэд оруулах нь хогийн цэгийн тоог бууруулах, нүүрстөрөгчийн давхар ислийн ялгарлыг багасгах, ус, эрчим хүчийг хэмнэх, улмаар тогтвортой ажлын байр бий болгох зэргээр олон талын нийгэм, эдийн засгийн үр өгөөжтэй шийдэл болж байна” хэмээн тэмдэглэв.

Уг үйлдвэр нь Улаанбаатар хотын хог хаягдлын менежментийг шинэ шатанд гаргахын зэрэгцээ барилгын салбарт үүсдэг байгаль орчны дарамтыг бууруулах бодит боломж болж байгааг албаныхан онцолж байна.

Эх сурвалж: НЗДТГ.