Хан-Уул дүүргийн 12 дугаар хороонд байрлах Морингийн давааны барилгын хог дахин боловсруулах үйлдвэр хүртэлх 1.5 км урттай авто замын барилгын ажил үргэлжилж байна. Энэхүү бүтээн байгуулалт нь барилгын хог хаягдлыг боловсруулах, эрчим хүч гарган авах цогц төлөвлөлтийн нэг хэсэг бөгөөд нийслэлийн инженерийн дэд бүтцийн чухал төслүүдийн нэгт тооцогдож байгаа юм.

Нийслэлийн Замын хөгжлийн газрын Авто замын хяналтын мэргэжилтэн Д.Тайваны мэдээлснээр, зам барилгын ажил энэ оны тавдугаар сарын 5-нд эхэлсэн бөгөөд одоогийн байдлаар газар шорооны ажил 80 хувь, нийт ажлын явц 45 хувьтай байна. Уг авто зам нь долоон метрийн өргөнтэй зорчих хэсэгтэй, хоёр талаар нь 1.5 метрийн явган хүний зам, нэг талдаа гудамжны гэрэлтүүлэгтэй байхаар төлөвлөгдсөн. Мөн Улаанбаатар хотын Захирагчийн ажлын албаны хүсэлтийн дагуу замын даацын хүчин чадлыг нэмэгдүүлэн гүйцэтгэж байгаа бөгөөд наймдугаар сарын дунд үе гэхэд хөдөлгөөнийг нээх зорилготой ажиллаж байгаа аж.

Замын дагуу байрлах барилгын хог дахин боловсруулах үйлдвэрийн хажууд нийслэлийн нэгдүгээр орлогч Т.Даваадалайн мэдээлснээр, 10 га газарт хог шатааж, эрчим хүч гаргах үйлдвэр барихаар төлөвлөжээ. Энэхүү төслийг Төр, хувийн хэвшлийн түншлэлийн тухай хуулийн дагуу үе шаттай хэрэгжүүлж байгаа бөгөөд өнөөдрийн байдлаар сонгон шалгаруулалтад дөрвөн компани шалгараад байна. Гүйцэтгэгч компани нь төслийн бүх зардлыг өөрөө гаргаж, үйлдвэрийг барьж ашиглалтад оруулах үүрэгтэй бөгөөд наймдугаар сард гүйцэтгэгчийг эцэслэн тодруулах юм.

Морингийн даваа орчимд хэрэгжиж буй эдгээр төслүүд нь хотын барилгын хаягдал хог хаягдлыг байгальд ээлтэй хэлбэрээр дахин ашиглах, зэрэгцээгээр эрчим хүч үйлдвэрлэх зорилготой байгаараа онцлог төслүүдийн нэг болж байна.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс