Өнгөрсөн долоо хоногт нийслэлийн 8 дүүрэг, 13 аймгийн 34 суманд аюулт үзэгдэл, ослын 106 удаагийн дуудлага Онцгой байдлын байгууллагад бүртгэгдсэн талаар ОБЕГ мэдээллээ. Дуудлагын дагуу төв, орон нутгийн Онцгой байдлын алба хаагчид газар дээр нь үүрэг гүйцэтгэн ажиллаж, 4 иргэний амь насыг аварч, шаардлагатай тусламж үйлчилгээг үзүүлжээ.

Дуудлагуудын дийлэнх нь буюу 92 нь объектын гал түймрийн дуудлага байсан нь энэ төрлийн эрсдэл байсаар байгааг харуулж байна. Мөн 1 удаагийн ой, хээрийн түймэр, 1 газар хөдлөлтийн чичирхийлэл, 1 хүчтэй салхи шуурга, 1 удаагийн үерийн дуудлага бүртгэгдсэн байна. Үүнээс гадна хүний буруутай үйл ажиллагаатай холбоотой 10 ослын дуудлага иржээ.

Онцгой байдлын байгууллагаас иргэдийг болзошгүй эрсдэлээс урьдчилан сэргийлэхийн тулд галын аюулгүй байдлыг хангах, байгалийн гамшигт үзэгдлийн үед шуурхай мэдээлэл авах, анхааруулгыг дагахыг анхааруулсан байна.

Эх сурвалж: ОБЕГ