Монгол Улсын Засгийн газар нярайн эндэгдлийг бууруулах тодорхой зорилт тавин ажиллаж байгаа бөгөөд 2030 он гэхэд 1000 амьд төрөлт тутамд 5.5, 2050 он гэхэд 2.3 хүртэл бууруулах стратегийг хэрэгжүүлж эхлээд байна. Энэ зорилгын хүрээнд нотолгоонд суурилсан бодлого боловсруулах, гадаад дотоод хамтын ажиллагааг өргөжүүлэх, хүний нөөцийн чадавхыг бэхжүүлэх нь гол чиглэл болжээ.

Тус стратегийн дагуу нярайн өвчлөл, эндэгдлийг бууруулах зорилгоор дараах үндэсний хөтөлбөрүүдийг хэрэгжүүлж эхэлсэн байна. Үүнд:

• Тархи хөргөөх эмчилгээг нутагшуулах

• Нярайн уушгины гипертензийн оношилгоо, эмчилгээг нутагшуулах

• Нярайн зүрхний нээлттэй мэс заслыг нутагшуулах

• Нярайн цогц эрт илрүүлгийн тогтолцоог нэвтрүүлэх

Эдгээр чиглэлээр үндэсний мэргэжлийн багуудыг байгуулж, шаардлагатай хөрөнгө оруулалт болон хүний нөөцийг чадавхжуулахад онцгойлон анхаарч байгаа бөгөөд өнөөдрийн байдлаар 200 гаруй эмч, сувилагчийг олон улсын түвшний сургалтад хамруулаад байна.

Түүнчлэн өнөөдөр эхэлсэн “Дутуу төрөлт, сэргийлэлт ба дутуу нярайн менежментийн шилдэг туршлага” сэдэвт олон улсын сургалт, семинарын үндсэн зорилго нь дутуу төрөлтөөс үүдэлтэй эрсдэлийг бууруулах, менежментийг сайжруулах чиглэлээр судлагдсан олон улсын сайн туршлагыг нутагшуулахад оршиж байна. Сургалтын үеэр нөхөн үржихүйн насны эмэгтэйчүүдийг эрүүлжүүлэх, жирэмслэхэд бэлтгэх тусламжийг чанаржуулах, ургийн пренатал оношилгоог сайжруулах шаардлагатайг мэргэжилтнүүд онцолжээ.

Уг арга хэмжээнд ДЭМБ, Ази, Номхон далайн Перинатологийн Нийгэмлэгүүдийн Холбоо, Монголын перинатологи нийгэмлэг болон бусад хамтран ажиллагч байгууллагууд, 21 аймгийн эх нярайн эмч нар оролцож байна. Сургалт гурван өдөр үргэлжлэх бөгөөд маргааш “Дутуу нярайн оновчтой менежмент: Имж эх асаргаа” сэдвээр хэлэлцүүлэг зохион байгуулагдана.

Эх сурвалж: Эрүүл мэндийн яам