Өнгөрөгч амралтын өдрүүдэд буюу 2025 оны зургаадугаар сарын 7-8-ны хооронд насанд хүрээгүй хүүхдүүд тээврийн хэрэгсэл жолоодон зам тээврийн осолд холбогдсон хоёр ноцтой хэрэг бүртгэгдлээ. Тээврийн цагдаагийн албанаас мэдээлснээр, 13-16 насны хүүхдүүд эцэг эх, асран хамгаалагчийнхаа автомашиныг зөвшөөрөлгүйгээр жолоодож замын хөдөлгөөнд оролцсон нь осол гарах шалтгаан болжээ.

Урьдчилсан байдлаар энэ хоёр хэрэгт нийт 9 хүүхэд холбогдож, тэдний нэг нь амь насаа алдаж, 8 нь янз бүрийн байдлаар гэмтсэн байна. Ослуудын мөрдөн шалгах ажиллагааг Тээврийн цагдаагийн албаны Мөрдөн шалгах хэлтэс хянан шалгаж байгаа бөгөөд уг үйлдлүүд нь хүүхдүүдийн эрүүл мэнд, амь насанд ноцтой эрсдэл дагуулах нөхцөл байдал үүссэн тул онцгой анхаарал шаардлагатайг холбогдох байгууллагаас анхаарууллаа.

Эцэг эх, асран хамгаалагчид тээврийн хэрэгслийн түлхүүрээ ил задгай орхихгүй байх, жолооны эрхийг насанд хүрээгүй хүүхдэд хэзээ ч шилжүүлэхгүй байх, мөн тээврийн хэрэгслийн аюулгүй байдлыг хангаж, хүүхдүүдийг зөв тээвэрлэхэд анхаарах нь зүйтэйг мэргэжлийн байгууллагууд уриалж байна.

Хүүхдийг замын хөдөлгөөнд оролцох насанд хүрээгүй үедээ автомашин жолоодох нь зөвхөн хууль зөрчих асуудал бус, амь нас, эрүүл мэндэд нөхөж баршгүй хохирол учруулах аюултай гэдгийг иргэн бүр ухамсарлаж, урьдчилан сэргийлэх үүргээ биелүүлэх шаардлагатай байна.

Эх сурвалж: Тээврийн цагдаагийн алба