Монгол Улсын Засгийн газар болон Азийн хөгжлийн банк (АХБ)-ны хооронд байгуулсан Санхүүжилтийн ерөнхий хөтөлбөрийн хүрээнд Улаанбаатар хотын авто замын сүлжээнд “Тусгай замын автобус” буюу BRT (Bus Rapid Transit) төслийг хэрэгжүүлэхээр шийдвэрлэж, бэлтгэл ажлуудыг эхлүүлээд байна.

BRT нь зөвхөн нийтийн тээвэрт зориулагдсан, түгжрэлээс ангид, хурдан, хүртээмжтэй, байгальд ээлтэй нийтийн тээврийн систем бөгөөд зорчигчдын хувьд тав тухтай, үйлчилгээний хялбар дөт бүтэцтэй гэдгээрээ онцлог. Уг системд зорчигчид автобусны зогсоолд ормогцоо төлбөрөө төлж, хоёр талаасаа зорчигчоо буулгаж авах боломжтой цахилгаан автобуснууд үйлчилнэ. Шал болон буудлын тавцан ижил түвшинд байх тул өндөр настан, тусгай хэрэгцээт иргэд, дугуйтай зорчигчид саадгүй зорчих нөхцөл бүрдэх юм.

BRT төслийг Ард Аюушийн өргөн чөлөө – Их тойруу – Намъянжүгийн гудамж – Нийслэл хүрээ өргөн чөлөө – Цэцэрлэгт хүрээлэн гэсэн чиглэлд нийт 12.7 км урт, 17 буудалтай байхаар төлөвлөжээ. Өртөө хоорондын зай 700-1300 метр, дундаж хурд 20-25 км/цаг байх бөгөөд өдөрт 25,000-35,000 зорчигч тээвэрлэх чадамжтай. Энэ нь өнөөгийн авто замын түгжрэлийн үед 5-7 км/цагийн хурдтай зорчиж буй нийтийн тээврийн хөдөлгөөнийг 4-5 дахин хурдасгах үр нөлөөтэй гэж тооцоолсон.

Төслийн хэрэгжилтийн хүрээнд шугам сүлжээний нарийвчилсан судалгааг гаргаж, автобусны буудлын доорх инженерийн байгууламжуудыг туннелийн системд оруулах судалгаа хийж байна. Энэ нь олон улсын стандартын дагуу засвар үйлчилгээ хийх боломжийг бүрдүүлж, тээврийн системийн тасралтгүй ажиллагааг хангах шинэ шатны шийдэл болох юм.

Дэлхийн 160 гаруй хотод хэрэгжиж, амжилттай хэрэгжиж буй тусгай замын автобусны туршлагаас суралцан Улаанбаатар хот ч мөн түгжрэл, агаарын бохирдол, зорчих хөдөлгөөний хурдац зэрэг олон асуудлыг шийдэх шинэ гарцтай болохоор зорьж байна.

Эх сурвалж: НИТХ-ХМОНХА