Нийслэлийн ИТХ-ын төлөөлөгч, Төв цэнгэлдэх хүрээлэнгийн гүйцэтгэх захирал Ж.Энхжаргалан болон АН-ын гишүүн, цахим орчинд “лайвчин” нэрээр танигдсан Д.Мөнх-Эрдэнэ нар олон нийтийн газар, цахим орчинд харилцан маргалдаж, нэгэндээ халдсан гэх үндэслэлээр тус бүр есөн хоног баривчлагдаж, 10 цагийн албадан сургалтад хамрагдах шийтгэл авсан билээ.
Тэдний хооронд үүссэн маргаан нь Төв цэнгэлдэх хүрээлэнгийн дотор болсон бөгөөд хэргийг Дүүргийн Эрүү, Иргэний хэргийн хялбар ажиллагааны анхан шатны тойргийн шүүхээр хэлэлцэж шийдвэрлэсэн байна. Зөрчлийн тухай хуулийн хүрээнд тэднийг олон нийтийг үл хүндэтгэсэн, харилцан нэгэндээ хохирол учруулахгүйгээр зодсон хэмээн буруутгасан байна.
Шийтгэврийн дагуу өчигдөр 14.00 цагт тэднийг Шүүхийн шийдвэр гүйцэтгэх газрын харьяа Баривчлах төвд хүргэсэн ч, Ж.Энхжаргалангийн өмгөөлөгч давж заалдах гомдол гаргаснаар шүүгчийн шийтгэлийн биелэлт түдгэлзэж, тэрээр 17.00 цагт суллагджээ.
Мөн өнөөдөр Д.Мөнх-Эрдэнийг өмгөөлөгч нь давж заалдах гомдол гаргасан бөгөөд үүний дагуу шүүх шийтгэврийн биелэлтийг түдгэлзүүлэх нөхцөл бүрдэж, түүнийг ч мөн суллах шийдвэр гарах магадлалтай болоод байна.
Ингэснээр давж заалдах шатны шүүхийн магадлал гартал тэдэнд оноосон баривчлах болон албадан сургалтад хамруулах шийтгэлийг түр хугацаагаар түдгэлзүүлсэн нь тодорхой болж байна.
