“Гаис” хамтлагийн дуучин Уугий буюу Х.Бат-Ундрал дахин мансууруулах бодис хэрэглэсэн хэрэгт холбогдож, цагдаагийн байгууллага зөрчлийн хэрэг үүсгэн шалгаж эхэлжээ. Энэ явдал тавдугаар сарын 31-нд “Сошл парк”-т болсон “Сургууль минь баяртай” тоглолтын дараахан ил болсон бөгөөд тухайн үед оролцсон уран бүтээлчдээс мансуурсан шинжтэй байсан нь анхаарал татжээ.

Эх сурвалжийн мэдээлснээр, Зөрчлийн тухай хуулийн 5.1-3 дахь заалтын дагуу буюу “мансуурсан боловч эрүүгийн хэрэгт хүрэхгүй нөхцөлд 101,000 төгрөгөөр торгох, эсвэл албадан сургалтад хамруулах, 7-30 хоногийн хугацаанд баривчлах” шийтгэл оногдуулах үндэслэлээр Цагдаагийн ерөнхий газрын Хар тамхитай тэмцэх газарт шалгаж байна.

Х.Бат-Ундрал өмнө нь буюу 2016 онд Хан-Уул дүүрэгт мансууруулах бодис биедээ авч яваад баригдаж, шүүхээс хоёр жилийн тэнсэн харгалзах ял авсан байдаг. Тухайн үед тэрээр олон нийтээс уучлалт хүсэж, дахин ийм зүйл хийхгүй гэдгээ илэрхийлж байсан. Тэрээр “Би залуучууддаа үлгэр дууриал болохын оронд ийм муухай зүйлтэй орооцолдсондоо уучлал хүсье” хэмээн мэдэгдэж байв.

Гэвч энэ удаа ийнхүү дахин ижил асуудалд холбогдсон нь олон нийтийн итгэлийг дахин хугалж байна.

Түүнчлэн “артист 113” нэрээр танигдсан Э.Очирваань ч мөн мансууруулах бодис хэрэглэсэн хэмээн зөрчлийн хэрэгт шалгагдаж байгаа аж. Тэрбээр энэ мэдээллийг үгүйсгэж, “шинжилгээгээр юу ч илрээгүй” гэж цахим орчинд мэдэгдсэн бол хууль, хяналтын байгууллагынхан “биологийн дээжээс бодис илэрсэн” гэж албан ёсоор мэдэгджээ.

Хоёр ч залуу уран бүтээлчийн хувьд ийм асуудалд дахин холбогдсон нь мансууруулах бодистой тэмцэх, залуучуудыг урлагаар зөв хөтлөх асуудал өнөөдөр ч ноцтой хэвээр байгааг сануулж байна.