Нийслэлийн авто замын түгжрэлийг бууруулах зорилгоор хэрэгжүүлж буй дүүжин замын тээврийн төслийн хүрээнд Яармаг-Хархорин чиглэлийн бүтээн байгуулалтын ажил эрчимтэй өрнөж байна. Энэхүү төсөл нь Улаанбаатар хотыг хөгжүүлэх 24 мега төслийн нэг бөгөөд энэ оны гуравдугаар сарын 10-нд барилгын ажлыг эхлүүлжээ.

Өнөөдрийн байдлаар өрөмдлөгийн шон суурийн ажлыг бүрэн дуусгаж, холбогч тавцан, багана суурь байрлуулах ажлыг 30 хувийн гүйцэтгэлтэй үргэлжлүүлж байна. “Моннис Инженеринг” компанийн төслийн менежер Б.Мөнхбаясгалангийн мэдээлснээр, нийт 19 багана суурь төлөвлөгдсөний зургаа нь Туул голын сав газарт байрлаж байгаа бөгөөд эдгээрийн цутгалтыг эхлүүлэхэд бэлэн болжээ. Цутгалт хийсний дараа бетон 70 хувь хүртэл бэхжих үед дээд хэсгийн металл хийцийн угсралт эхлэх ба бүх суурийн ажлыг наймдугаар сар гэхэд дуусгахаар төлөвлөсөн байна.

Одоогоор 70 гаруй инженер, техникийн ажилтан төслийн трассын дагуух 21 байршилд ажиллаж байгаа бөгөөд барилга угсралтын ажлыг 2025 оны арванхоёрдугаар сард бүрэн дуусгаж, 2026 оны хоёрдугаар улиралд улсын комисст хүлээлгэн өгөхөөр төлөвлөжээ.

Нийт 4.2 км урттай энэхүү дүүжин зам хоёр зогсоолтой, 98 ширхэг кабинтай байх бөгөөд нэг кабин нь 10 зорчигч тээвэрлэх хүчин чадалтай. Зорчигчдын аяллын хугацаа дунджаар 11 минут байх бөгөөд тулгуур багануудын өндөр нь 7.5-42 метрийн хооронд, кабин тээвэрлэх дундаж хурд нь 21 км/цаг байна. Дүүжин зам ашиглалтад орсноор Яармаг, Нисэх чиглэлийн авто замын ачааллыг бууруулах, хөдөлгөөний хурдыг дөрвөн хувиар нэмэгдүүлэх үр дүн хүлээгдэж байна.

Эх сурвалж: Нийслэлийн Засаг даргын Тамгын газар