Авлигатай тэмцэх газрын Урьдчилан сэргийлэх, соён гэгээрүүлэх хэлтсээс 2025 оны тавдугаар сарын 26-30-ны өдрүүдэд авлигын эсрэг цогц арга хэмжээг олон байгууллагын оролцоотойгоор зохион байгууллаа. Энэ хүрээнд авлигын шалтгаан, нөхцөлийг арилгах, авлигын үйлдлийг таслан зогсоох, үр дагаврыг бууруулах, мөн ил тод байдлын үнэлгээ хийх зорилгоор төрийн хэд хэдэн байгууллагатай хамтран ажиллав. Үүнд Соёл, урлагийн газар, Чингэлтэй дүүргийн Газар зохион байгуулалтын алба, Татварын хэлтэс, Нийгмийн даатгалын хэлтэс, Улсын II эмнэлэг багтаж байна.
Түүнчлэн авлигын эрсдэлийг бууруулах, шалтгаан нөхцөлийг арилгах чиглэлээр Гадаад харилцааны яам, Эрчим хүчний яам, Гаалийн ерөнхий газар, Сонгинохайрхан дүүргийн Хөдөлмөр, халамжийн үйлчилгээний хэлтэс, “Радио телевизийн үндэсний сүлжээ” ТӨҮГ болон Нийслэлийн Хяналт шалгалтын газарт зөвлөмж илгээжээ.
Ил тод байдлыг хангах, төрийн байгууллагын үйлчилгээний хүнд суртлыг бууруулах зорилгоор Дорнод аймгийн ИТХ-ын “Албан татварын хэмжээг тогтоох тухай”, “Тэмдэгтийн хураамжийн хэмжээ тогтоох тухай” тогтоол, мөн Гадаад харилцааны сайдын “Дипломат албан тушаал эрхлэх болзол хангах тухай” тушаалыг хянасан байна.
Авлигын эсрэг боловсрол олгох хүрээнд нийт 28 байгууллагын 1591 албан тушаалтан хамрагдсан сургалт зохион байгуулсан нь өнгөрсөн долоо хоногийн томоохон үр дүнгийн нэг болжээ.
Эх сурвалж: Авлигатай тэмцэх газар
