Дархан-Уул аймгийн Хот тохижилт үйлчилгээний газраас өвлийн улиралд дөрвөн сарын турш хүлэмжид үрслүүлэн ургуулсан нэг наст цэцгүүдийг хотын төвийн гудамж, уулзвар, тойргуудад суулгах ажил эрчимтэй үргэлжилж байна. Энэхүү цэцгийн мандлын тохижилт нь аюулгүйн тойрог, Монгол алтны уулзвар, 16 давхрын шинэ тойрог зэрэг гол зам дагуух талбайг хамарч буй.
2025 оны тохижилтын ажилд 10-11 төрлийн 200 мянга гаруй нэг наст ургамал ашиглаж, “Арга билиг”, “Хаан бугуйвч”, “Хатан сүйх”, “We love Darkhan” зэрэг уран сэтгэмжтэй зохиомж бүхий хэлбэр дүрсээр хотын өнгө төрхийг сэргээж, иргэдийн сэтгэлд хүрэх бүтээлч орчныг бүрдүүлж байна. Уг ажлыг Хот тохижилт үйлчилгээний 60 ажилтан гардан гүйцэтгэж байгаа бөгөөд тэд нийтийн эзэмшлийн талбайд амьд ургамлын гоёлын загваруудыг бүтээж, байгальтай нийцсэн орчныг бий болгож буй юм.
Харин иргэд, хүүхэд багачуудыг эдгээр ногоон байгууламжаа хүндэтгэн, хөлөөр гишгэлж сүйтгэхгүй, хамгаалж, хайрлаж байхыг албаныхан уриалж байна.
Эх сурвалж: Дархан-Уул аймгийн Хот тохижилт үйлчилгээний газар
