Чингэлтэй дүүргийн 24 дүгээр хорооны нутаг дэвсгэрт, лагерийн бүсэд байрлах “Зуун мод” цэцэрлэгт хүрээлэнг нийслэлийн иргэд, хүүхэд, залуучууд, гэр бүл, найз нөхдөөрөө хамтдаа байгальтайгаа ойр, чөлөөт цагаа өнгөрөөх шинэ ногоон бүс болгон тохижуулах ажил ид үргэлжилж байна. Одоогоор нийт ажлын 80 хувийг гүйцэтгээд байгаа бөгөөд ирэх долоодугаар сард бүрэн ашиглалтад оруулахаар төлөвлөжээ.

Тус цогцолбор нь байгальд амрах боломжийг бүх талаар хангасан шийдлүүдийг агуулж буй. Тухайлбал, гол цөөрмийн эргээр майхантай амралтын хэсэг байгуулж, мах шарах задгай талбай, олон төрлийн спортын талбай, задгай театр, ногоон байгууламж бүхий орчин, 100 автомашины зогсоол, нийтийн бие засах газар зэрэг дэд бүтэц, үйлчилгээний нөхцөлийг бүрдүүлж байгаа нь онцлог юм.

Уг төслийг хэрэгжүүлснээр нийслэлийн иргэд хотын төвөөс алслахгүйгээр гэр бүл, найз нөхдөөрөө хамтдаа тав тухтай, цэвэр агаарт, эко орчинд амрах шинэ цэгтэй болох бөгөөд ялангуяа зуны амралт эхлэх энэ цаг үед томоохон хэрэгцээ, хүлээлтийг хангах ач холбогдолтой гэж холбогдох албаныхан онцолж байна.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс